五礦資源（1208）變身五礦系鋁業旗艦唔夠1年，啱啱公布中期業績，就有爆炸性增長，要搞。
五礦上年10月先完成注入氧化鋁貿易業，晉身全國最大嘅氧化鋁進口商，呢期公布06年度中期（6月止），營業額大增9倍到68.6億銀，純利亦暴升近5倍到5.79億銀，身價盡顯。就當全年度純利，只係維持喺中期水位，都係講緊6倍PE，即係話，五礦06年度PE，隨時低見4、5倍。
再講，五礦以配股形式購入氧化鋁貿易業，當時每股配股價都講緊2.86元，呢期憧憬五礦再獲氧化鋁生產業務注資同時，五礦現價低企2.15元，又未免太低殘。博五礦兩成半回報，價見2.68元，五礦仲係低企5倍PE水位，P/B1.1倍，未有耐追到同類股1.8倍水位。
富豪博炒業績
富豪（078）打底打咗3個月，呢期買入博炒業績。呢期市場似乎興炒業績股，唔理好醜，都照炒如儀。而富豪揸住嘅豪宅富豪海灣，近排雖然停晒手，但因為04年熱賣兼未回撥盡，所以，06年度應該仲有回撥因素，支持業績，富豪嚟緊嘅06年度中期（6月止），應該係炒賣焦點。
再講，富豪實際NAV1.47元，現價（0.6元）折讓近60%，炒折讓又得。短打博見0.7元，潛在回報率16%。
錢雋