侍仔：呢個星期國際賽賽期，大家有無覺得有些少失落呢？
招積域：點會呀，波成日都有得賭，無4大聯賽重有日職同埋巴甲；何況國際賽都幾好賭呀，又多強弱對碰。
菠蘿文：我賭少場無所謂，近日見到韋斯咸突然間係咁增兵，想問佢係咪想爭聯賽冠軍？馬斯真蘭奴同泰維斯突然加盟，及時註冊踢歐洲賽，韋咸真係可望成為奪標黑馬。
侍仔：韋咸今次真係有錢而且又用得其所啦！
馬斯真蘭奴信心爆棚
招積域：點只用得其所，馬斯真蘭奴重想要着埋卜比摩亞當年嗰件6號球衣，你睇佢自信幾咁爆棚！
菠蘿文：着名宿球衣喎，但係咪好似卜比咁傳奇先？咪好似紐記馬田斯咁黑仔先好，着咗舒利亞件9號，但加盟後第一場聯賽就受傷。
林伯：你講到我都想去馬會買埋注韋斯咸拎冠軍嘅奪標賠率。
侍仔：乜阿伯都賭錢㗎？
林伯：阿伯唔可以賭錢咩？係你先唔捨得賭錢啫，又怕俾女友鬧。
國際賽不妨吼冷門隊
菠蘿文：侍仔，不如我同你輸賭，你今個星期內唔賭錢，我請你食一個星期下午茶。
招積域：下星期有咩波要令侍仔忍唔到手呢？
菠蘿文：都係國際賽賽期，有侍仔鍾意嘅冷門球隊。
招積域：即係……
菠蘿文：有馬其頓對英格蘭，阿塞拜疆對哈薩克同埋阿美尼亞對比利時，以侍仔嘅心態，佢一定會下注較弱嗰隊贏，佢每次都係咁樣。
侍仔：英格蘭死過喺馬其頓手上，哈薩克自加入歐洲足協後成績穩步上揚，由最初場場輸最少3球，到𠵱家開「細」，對住阿塞拜疆可以搶到分數㗎。
林伯：你連巴塞正選11人都未識晒，就學人去睇哈薩克足球？你知唔知哈薩克喺邊？扮晒專家咁樣，你咪又係睇馬會個網。