有心過澳門歎美食，首選林記，點解？因字號老、多街坊支持。老闆叫權哥，晚晚都做到唔停手，初頭喺電話聽佢講：「我呀，都幾樂此不疲咁創新菜式㗎，咁先討到嘴刁食客歡心嘛。」心諗講得好官腔喎，後尾過澳門打的採訪我話：「唔該去林記……」話口未完，司機一聽到林記就自動波車到目的地，我先知林記原來咁響朵。
記者：方綺君
攝影：林栢鈞
模特兒：Rub
多街坊熟客支持
有口碑、有歷史、有信譽，林記自然多人捧場。仲記得採訪當日，我出澳門碼頭打的︰「唔該去林記……」都未講完的士大佬已經話：「得得得……」之後幾手軚已經飛到目的地，問番至知原來林記響朵到連歐陽震華、譚小環、Solar等都係捧場客！老闆權哥係林記第二代傳人︰「20年前，我阿爸一手一腳喺氹仔開檔，到𠵱家搬嚟黑沙環，計落都有10年喇。我20多歲跟阿爸做葡式BBQ，當時已經好生意到唔停得手，𠵱家好多客都由氹仔一路捧場到黑沙環，可以頂咁耐又日日客滿，都好開心㗎！」
餐牌要成日變
餐廳菜式有一特色，就係常用洋葱同海鹽，權哥解釋：「因為我提供唔少咖喱菜，其他海鮮菜都要加洋葱嚟帶出鮮味，所以每日可以用到150斤洋葱，我整嘅巴基斯坦咖喱，好多洋葱好惹味㗎。」權哥唔會耍大家，下次嚟到除咗OrderBBQ菜式，試埋咖喱都無妨。我最欣賞權哥嘅創意無限︰「其實乜嘢都可以做BBQ，最緊要煮得好食，都幾花腦筋㗎，我自創新菜，要顧及食材本身當造與否，澳門人又嘴刁喎，所以餐牌要唔停咁變，去迎合食客口味。」今日介紹嘅法式花甲皇、海鮮拼盤，就是權哥最新得意之作。
法式花甲皇$50
花甲皇嚟自中國海域，日日新鮮運到，味鮮料靚就梗，最正係平街外一半價錢。花甲拖水後放入洋葱、西洋腸、白酒等一齊炒，入口肉汁四溢滿嘴鮮甜。
海鮮拼盤
大大盤，一大班人開P最啱食；內有奄仔蟹、花甲皇、大蝦、魚（可自選）等，加入西洋臘腸、椰菜白烚；因為夠新鮮，烚出嚟湯底好鮮味。
鹽焗奄仔蟹
用海鹽焗奄仔蟹20分鐘，焗至軟身為止，海水味被蟹肉完全吸收。都係嗰句，蟹新鮮，生猛即劏即焗就好入味。
葡式紅酒燴牛仔髀
紅酒加牛骨熬幾小時弄出濃汁，再燴加拿大牛仔髀；菜式加入大量紅腰豆，呢個係葡國菜特色。牛仔髀肉質勁腍，入口無渣又嫩滑。
香草芥末燒羊十一
羊十一即羊腰扒最低部位，用嘅係最鮮嫩9個月大羊仔，用香草、芥末、黑胡椒先醃後燒，未食已經聞到香。
加拿大牛肋骨扒
簡簡單單用香草醃兩小時，燒至6成熟；雖大大嚿但肉質勁嫩，全因用了至靚加拿大牛肋骨扒先有咁嘅效果。
蒜子燒牛膝
用香草、白酒、蒜茸醃過嘅牛膝燒至6成熟，外脆內軟。記得食埋伴碟嘅焗薯同原粒炸蒜呀，口感又諗又甜。
食客有Say
搵食攻略
林記燒烤（853-6625872）
地址︰澳門黑沙環海濱花園第8座C舖（設代客泊車服務）
交通：澳門碼頭乘的士約$25直達
營業時間︰6:00pm-3:00am
最好賣︰咖喱羊、燒香草羊、燒牛脷、豬肋骨等
