癦，有人視為標記，有人視為缺陷，藝人為了上鏡靚靚，多數都會把癦脫掉。其實從玄學角度看，癦生在身體不同部位，都暗藏命運玄機。究竟楊千嬅和葉璇胸前有癦，是否胸懷大志？八両金臉上有粒連毛癦，可會是發達毛，是否一斷就斷財路？堪輿家蘇民峰和李丞責以玄學角度分析，癦生長在不同部位，對個人運程有何影響。 撰文：比華利
胸懷大痣組
楊千嬅、朱茵 好奇心強
楊千嬅和朱茵的心口當眼位有一粒癦，千嬅時常笑稱自己胸懷大「痣」，所以不會刻意用遮瑕膏掩蓋。
李丞責：「呢粒癦叫『胸羅萬丈』，代表為人好奇心好強，為咗滿足自己就會好學不倦，佢又好有胸襟，包容能力好廣闊，做事有計劃同內斂。」
葉璇狠勁勇敢
上圍豐滿的葉璇最愛穿低胸裝騷身材，所以時常不經意露出左胸上一粒癦，非常顯眼。
李丞責：「呢粒癦叫狼心癦，有呢種癦嘅人做嘢有一股狠勁同埋好積極。就好似清兵咁，有前冇後，做起嘢上嚟勇敢又果斷。」
面癦組
楊丞琳、薛凱琪 影響權力
可愛教主楊丞琳和薛凱琪顴骨位上有一粒癦，每次甜甜一笑時，都隨着臉頰牽動，更添稚氣。
蘇民峰：「顴骨主管人嘅權力，癦生長喺左右唔同位置，分別有唔同嘅影響。如果生長喺左邊位置就管30歲前，右邊就管30歲後嘅運程，除非佢做管理階層，咁下屬會唔聽佢嘅話，陽奉陰違，不過佢哋係藝人就絕對冇影響。」
薛家燕 父緣較薄
薛家燕額頭正中的癦已成為其標誌。如果她扮演印度西施，就不用化妝了。
蘇民峰：「佢呢粒癦其實對個面相，又或者個人運程都冇好大影響，不過粒癦生喺天庭位，相學嚟講係同爸爸緣份薄啲，所以佢好細個就要出嚟社會做嘢。」
阿Sa 搵極唔夠
蔡卓妍（Sa）唇邊長有一粒癦，未知可是「為食癦」，為一向食極唔肥的她帶來口福？
蘇民峰：「生喺嘴唇對上先叫為食癦，代表有口福，佢呢粒係貧癦，為人成日有唔夠錢使嘅心態，好鍾意同人比較，佢無論搵幾多錢都呻唔夠。」
何潤東 添脂粉味
何潤東左邊臉頰當眼位長有一粒癦，對於男士來說，這粒癦替他增添了點點脂粉味。
蘇民峰：「基本上如果臉上嘅癦唔係生喺一啲同面相有關嘅特定位置，例如一個人嘅『面珠登』，咁樣對運程係冇特別影響嘅。」
露疤組
張學友 權力下挫
張學友右臉的顴骨位置有一道小疤痕，對於實力派的他，其實沒有太大影響。
蘇民峰：「男女無論顴骨位置有癦定疤痕，都會影響運程，左臉係代表30歲前，右臉係代表30歲後。疤痕即破相影響權勢，但學友唔係做生意，就唔驚下屬作反啦！」
徐淑敏 手術留疤
應屆落選港姐徐淑敏穿上泳裝拍照時，被發現下腹部一條小疤痕，她自稱早年因割盲腸造成。
李丞責：「無論係因為病做手術，抑或整容而喺身體上留低疤痕，呢啲都唔算破相，唔會帶嚟厄運。」
缺陷組
鵬菲愛女靚佬湯愛女 兔唇無損運程
王菲與李亞鵬的女兒李嫣、荷李活影星湯告魯斯（TomCruise）和女友姬蒂荷姆絲（KatieHolmes）的女兒Suri天生兔唇，未知這缺陷會否影響運程？
蘇民峰：「從相學嚟睇，大缺陷基本上對個人嘅運程唔會有影響，相反嚟講，細眉細眼嘅嘢反而影響較大。兔唇算係大缺陷，呢個缺陷係天生，好多嬰孩出世就有兔唇，但好快就會進行修補手術，𠵱家嘅手術好仔細，所以長大都唔會破相。」
蔡一智 孖指標記
草蜢成員蔡一智右手拇指有孖指，未知相學上可有特別影響？
李丞責：「孖指喺相學上係唔會對運程構成影響，佢只係身體一部份，同胎痣一樣，只算係個人標記。」
毛癦組
八両金 漏財之兆
冬菇頭、粗金鏈和左下顎長有毛癦是八両金的特徵，有指癦上生毛是發達毛，可是八両金近年撈來撈去都未見有發達迹象？
蘇民峰：「邊個話粒癦有條毛就會發達？總之有礙儀容就要剪咗佢。每個人嘅下顎係主自己間屋，當下顎有粒癦，即係穿咗個窿，間屋咪成日漏水囉！」
胡楓 耆英福癦
胡楓與八両金一樣，同樣是左下顎位置有粒毛癦，未知他可會跟八両金同是漏財癦？
蘇民峰：「胡楓嘅年紀同八両金差好遠，胡楓呢粒算係老人癦，老人家到咁上下年紀，自自然然長出好多粒癦，呢啲癦對運程冇影響。」
