「如果可以要人翻生，唔使講都係家駒啦，係就好啦，我個演唱會就有嘉賓啦，佢係最配得上搖滾嘅人，可以話係香港嘅搖滾樂上最舉足輕重嘅人。佢又係最明白我嘅人，如果佢再生，就會知道我𠵱家做緊啲乜，佢係我最好嘅朋友、死黨同永遠嘅偶像，佢教我太多嘢，無論係音樂抑或係做人嘅道理。」
復活對象：黃家駒
劉浩龍痛改前非
「我最想我爺爺翻生，我細個唔係跟阿爸阿媽一齊住，而係同阿爺阿嫲住，但係喺我3、4歲時，阿爺就走咗啦。阿爺好錫我㗎，佢本身係一個視錢如命嘅人，有次我將佢啲10蚊紙同100蚊紙摺飛機飛落街，佢都冇打我。最離譜係我試過走入阿爺擺衫個衣櫃入面屙屎，屙完之後就走番出嚟扮冇事，我曳到咁佢都係冇打我。所以我好想佢翻生，等我好好咁照顧番佢。」
復活對象：爺爺
古巨基想睇功夫
「李小龍喺我心目中好似一位神聖嘅人，佢係中國人嘅驕傲，佢嘅功夫對全世界武術界有好大影響，加上佢嗰種練武精神，畀到好多習武嘅人、甚至所有人，領會到唔好隨便放棄嘅處事態度。我記得以前喺《歡樂今宵》睇過佢喺鏡頭前耍真功夫片段，簡真係令我目瞪口呆。」
復活對象：李小龍
鄧健泓模仿貓王
「貓王皮禮士利到𠵱家畀人嘅感覺都好似未離開咁，世界各地有好多人都不停模仿佢，好多歌手都翻唱貓王名曲。如果可以令真正嘅貓王企喺舞台，咁大家都唔使再靠模仿同翻唱嚟紀念佢。貓王喺舞台上嘅投入感，係好值得我哋學習，佢好享受演出，呢樣係當成功藝人先決條件。」
復活對象：貓王皮禮士利
鄭希怡延續百變
「我本身係梅艷芳嘅fans，所以最想梅姐翻生，佢開過咁多次演唱會，我一次都冇睇過，作為一個fans我覺得係一個好大嘅遺憾。雖然之後我都買番晒梅姐演唱會嘅影碟睇番，但係我覺得喺現場睇個氣氛一定好正。而且我認為𠵱家冇一個歌手有梅姐嗰份壓台感，加上佢個百變形象都冇人能及。」
復活對象：梅艷芳
梁靖琪彌補遺憾
「大姨丈好錫我，我細個時候，佢成日接我返學放學，得閒就帶我去玩買嘢畀我。我大個咗入行，佢喺澳洲都會儲起我所有剪報同雜誌，好似我忠實fans咁。當佢患病入院嘅時間，撞正我啱啱入行，完全冇時間飛去澳洲探佢，我記得佢離開嗰陣，我去咗內地拍戲。我知道佢好想我去探佢，不過最終都見唔到佢最後一面，同佢講聲拜拜。」
復活對象：大姨丈
周麗淇兔牙深刻
「我細細個就好鍾意翁美玲，覺得佢好靚，做戲都好好，尤其是同苗僑偉拍嗰套《天師執位》，睇到我如癡如醉，可惜我入行前佢已經唔喺度，如果佢仍然喺度，相信佢會做更多好戲畀大家睇，佢最令我印象深刻就係嗰對可愛嘅白兔仔門牙。」
復活對象：翁美玲
鄧麗欣一字之差
「其實鄧麗君過身嘅時候我好細個，我喺懂性之後先聽佢嘅歌，但一聽就好鍾意，同埋我唱歌老師都有話過我同佢把聲嘅底都幾似，比較柔同埋高音，唱歌嘅時候都有少少受佢影響。仲有我同佢個名只係差一個字，如果佢真係翻生，我好希望可以同佢合作。」
復活對象：鄧麗君
採訪、攝影：李珮洳、馬建華、胡比、駱華齡
