吃得清淡，知易行難。少肉多菜是健康，我知，你知，大家知，但吃慣濃味的都市人，一聽見青菜豆腐這組合，總覺對不起滿肚肥腸、一腔味蕾。信我一次吧，來舀一碗莧菜海皇豆腐羮，莧菜份量夠多，一鍋泛青，青中綴白，不過賣相靚沒用，知你怕口寡，加瑤柱碎、帶子、鮮蝦等海鮮，包你吃得健康兼滿足。
記者︰方綺君
攝影︰楊錦文 模特兒︰Sindy
多藝人熟客幫襯
坑口街坊對「食得妙」這家食店一定好熟悉，店子主打的家常小菜一向口碑不俗，不少藝人如郭可盈、林文龍、林曉峰等都是捧場客，每晚做到爆場不停手。生意好，老闆娘Iris自然四萬咁口︰「我堅持做好嘢畀客人食，用料一定要靚要新鮮，唔做Cheap嘢㗎。」生意好自然要發圍，故在1個月前，「食得妙」在九龍城開新分店，正式進駐這個美食天堂。九龍城主打家常小菜的菜館不多，「食得妙」佔到天時地利，開張不久已經儲到一班熟客，全因提供的菜式夠多元化，自創菜式有，新改良的傳統菜式亦不少，單是蟹菜式已有10款之多，兼且不是其他餐館人有我有的辣椒蟹、薑葱蟹這般行貨。大廚明哥一有時間就和Iris研究新菜，務求令食客每次幫襯都有新發現。
為這篇《食語錄》，我要求Iris改良餐牌本身已有的海皇豆腐羮：「可唔可以放菠菜之類一齊煮？」Iris話︰「哎吔！菠菜唔可以同豆腐一齊煮㗎，等於牛奶同檸檬唔可以撈埋一樣，一齊食會肚痛㗎。」原來如此，只怪自己見識淺。Iris有多年經營食肆經驗，當大廚的丈夫好了解食材配搭，臨走，我聽到他們不停吩咐夥計︰「叫呢個菜，記得跟個汁畀佢。」「叫嗰個菜呢，唔好畀醬，因為嗰個菜食原味為主，客人叫到先畀……」聽得出夫婦倆對食物質素的執着與誠意。
解說
白菜煮豆腐，亦可作菠菜煮豆腐或小葱拌豆腐，歇後語簡單直接，──一清二白，意思是不論做人做事，都應該光明磊落，不能留有瑕疵、不能留下給人說三道四的痛腳把柄。另一意思是指某人身家清白，沒有任何不良紀錄。
莧菜海皇豆腐羮$68
吃得清淡點吧，這鍋豆腐羮濃稠度剛剛好，有齊新鮮莧菜、瑤柱碎、帶子、鮮蝦、冬菇粒等配料，每一口都啖啖肉，明哥說︰「要煮到唔過杰又唔會水汪汪，火候好緊要㗎。」
1.爆醬蝦丸 6粒$55
店中一款枱枱必叫的菜式。明哥不嫌工夫多，新鮮蝦剝殼起肉，搗碎自打蝦丸，所以粒粒入口都非常彈牙。炸好上碟要立即吃，中間溢出的半溶芝士很香口，放涼就沒那麼美味了。
2.貴妃醬炒蟶子皇 每両約$10
自製貴妃醬，成份有十多種，秘方保密。上碟，有空運到港的新鮮蘇格蘭蟶子皇3大隻，每隻約重3両，新鮮，就一定美味，起鑊灼一灼加貴妃醬炒，簡簡單單已經好惹味。
3.食得妙生煎雞 半隻$98
走地雞起骨切件，燒紅鑊落鑊炒再加入上湯，雞塊充份吸收上湯味道，香噴噴送白飯一流。因為雞起了骨，所以半隻看起來較少份量，實則入口啖啖肉。
4.氹仔煮花蟹 每両時價約$9
有靚蟹，當然要有一流醬汁。此菜改良自豆豉雞，醬汁用番茄、花奶、牛油、芫荽、咖喱煮成，味道香而不辣，細味甚至有少許甜，跟蒸饅頭一客，饅頭蘸吃很惹味。
5.蝦子扒南瓜 $55
是一道健康素食，日本南瓜先蒸20分鐘，待瓜身變腍，再淋上用蝦子和上湯煮成的蝦子上湯羮。南瓜入口香甜，瓜肉不會蒸得太腍而失去口感。
搵食攻略
食得妙（23836686）
地址︰九龍城福佬村道64號地下
營業時間︰12:00nn-3:00pm，5:30pm-1:00am
交通︰九龍塘地鐵站乘的士約$20
座位︰105個
最好賣︰貴妃醬炒蟶子皇、爆醬蝦丸、食得妙生煎雞