謝霆鋒上月底26歲牛一，前晚喺佢中環間band房開生日會，除咗栢芝之外，老竇謝賢（四哥）、媽咪狄波拉同妹妹婷婷都拉隊出席。
拜拜肉盡現
有愛情滋潤嘅栢芝為咗戒煙，搞到暴肥11磅，前晚佢先去紅館睇草蜢演唱會頭場，見佢塊面變到圓咕碌，身形、手臂同大髀更加啖啖肉。當佢舉起雙手揮動吹氣棒時，兩臂嘅拜拜肉仲「瑯吓瑯吓」。睇完騷，栢芝即刻坐車飛去霆鋒間band房，趕住為愛郎祝壽兼見家長。
約凌晨點幾鐘，四哥、拉姑同婷婷齊齊離開，半夜三更都戴黑超嘅四哥同婷婷面黑黑。有記者問四哥有冇同囝囝傾吓婚事問題？點知佢突然好惡咁問一句：「乜話？」對方惟有問多次，四哥突然發老脾大喝：「你short㗎！」
蘇豪撐枱腳
同霆鋒玩咗幾日之後，栢芝今日將會復工，噚日下晝就陪霆鋒去武館練詠春，到夜晚近9點再去中環蘇豪區撐枱腳，霆鋒明顯唔多熟路，行過兩間意大利餐廳都揀唔啱，仲問在場記者：「邊度有好嘢食呀？」之後兩個人終於決定去Nidias餐廳食西式fusion菜。
臨入餐廳時，霆鋒仲搭住記者膊頭話：「我明白你哋做嘢，但入面可唔可以唔影？畀啲私人空間我哋吖。」栢芝冇搭嘴，只係笑咪咪一齊入餐廳開飯。