食完午飯，行經置地廣場與歷山大廈之間之行人天橋，突然有一位靚太伸手出嚟阻住去路，左丁山驚住撞親靚女就手尾長，立即企定定，一望，原來係師奶T，佢旁邊有位美少女，於是賣口乖：「T太，你細妹呀！」師奶T笑到花枝招展：「唔使咁好口，呢個係我個女，喺英國返港放暑假，下個禮拜就走嘞，咪帶佢出嚟行商場，買吓嘢囉。」於是問美少女：「讀幾年班呀？」美少女話：「升預科。」再問：「考GCSE有幾多個A呀？」師奶T笑得更甜，代女兒搶答：「十個A*！」（Astar即A+）於是左丁山祝福美少女：「後年考入牛津劍橋畀阿媽睇！」
香港人子弟喺英國讀書真係成績出眾，左丁山吸取過往經驗，逢見到朋友子女在英國考GCSE（相當於香港中學會考），唔會問佢哋考成點，一定問考到幾多個A，以示尊重。今年英國高考（ALevel），出咗一位8A狀元，就係前《虎報》總編輯、前報業評議會總幹事、現任職有線寬頻嘅黃俊東嗰位公子。黃公子在貴族名校Harrow脫穎而出，直入牛津，叻到黃俊東都未必相信，如果碰到老黃，一定問佢如何教子成才。碰啱前《南華早報》副老總、前《讀者文摘》總編輯，現任職城市大學嘅馮強老兄位千金今年在港大法律系畢業，考IELTS，居然考到九分滿分，唔通啲英文報紙老總教仔女讀英文，特別醒過人？
老友們啲仔女讀書咁醒，左丁山自歎不如。不過人比人，比死人，為人家長者，千祈唔好睇見老友記仔女考10A、8A，就返屋企話自己仔女懶惰，或者要怪吓係自己不以身作則，多年來冇培養仔女讀書興趣呢！
講到呢度，要提吓一位讀者Eric來電郵，佢話日前（八月二十三日）本欄講中國四大名旦係鞏俐、章子怡、徐靜蕾、趙薇，其中鞏俐已經out咗幾年，其地位應由周迅補上。左丁山少睇戲，徐靜蕾與周迅是何等樣貌做過乜嘢戲，至今矇查查，多謝Eric指點。中國有四大名旦，香港電影圈有冇四大女星呀！Eric如果知道，唔該通知聲。