為了方便工作，所以今次住在上野。須知道東京火車網絡雖然發達，不過去得遠時，真係轉車都轉到頭暈；喺上野每次到埼玉新都心站嘅會場都係一程車36分鐘搞掂，方便好多。
上野少港人似流放
香港人嚟日本，大多住喺新宿嘅太子或vintage酒店，貪其方便shopping，而且新宿係不夜城，夜晚返酒店放下行李再出過去都未遲。所以今次獨居上野，好少撞到香港人，真係有種流放塞外嘅感覺。
點知今日喺會場做完嘢，返到上野站，預備慢慢行返去，順便睇吓邊處有地方醫肚之際，後面忽然有人嗌我，轉身一望，原來係台灣民生報記者兼圓球城市嘅專欄作家艾廸；閒聊幾句之後，問起他住何方，答案竟然與我同一酒店，仲要同一層樓。
當我正諗住難得有個伴可以一齊食晚飯之時，艾廸就話原來今次係同老婆囝囝一齊過來；佢工作時另一半就逛街，𠵱家正等老婆過來會合一起吃晚飯。如此情形下，我亦費事做電燈膽，惟有繼續孤身作戰、搵地方醫肚囉！