大市連升4日，恒指噚日最高見17514點，創近6年新高。上月中恒指掂一掂17500後即刻連跌幾日，唔見咗600幾點，正當大家以為港股會重演5月大跌市之際，好友奮力反攻，結果將啲淡友挾到氣咳。
雖然好友好似佔上風，但係唔少散戶蠢蠢欲動，想跟淡友搵食。
「香港討論區」內，shekkinlam話「如果想入熊證，大家有冇好介紹……啲Put輪好離譜，升市時跌到PK，跌市就係咁意升小小」；「公眾投資168綜合論壇」SirCCT就話「RSI第一個背馳應該出現，MACD都唔係好睇，SlowSTC一過70就準備……」；「香港討論區」嘅vimix教大家唱「OnlyPut」，仲附埋改編歌詞。
恒指上到呢個位，好多人都博雙頂唔穿掉頭大插，加上唔少專家都叫散戶睇路，散戶博大市散一浸，一啲都唔奇。
但係如果睇周線圖，真係Put唔落手。期指小時圖雖然有強弩之末嘅感覺，但日線圖仲有生機，𠵱家做Put，唔覺意俾人挾上17600至散水就冇癮，不如等日線圖MACD確認無力上破至造淡，雖然有啲蝕章，但總好過捱價。
余文