Bella說得一口流利廣東話，由印尼來港工作已9年，期間認識了現在的香港丈夫。愛入廚的她，雖經常炮製蒸魚、炒菜等中國菜慰夫，但至愛的，始終是印尼家鄉菜，難得丈夫一樣受落：「喺香港可以買到各種印尼香料，煮出嚟嘅印尼菜好有家鄉Feel，連我老公都讚好。」印尼人無辣不歡，印尼主婦有句話：「屋企可以無老公，但唔可以無辣椒。我哋好鍾意生食指天椒，有時一啖牛肉餅一啖指天椒，不過我一次過只能吃兩隻指天椒。」
除嗜辣外，Bella還愛羊：「印尼傳統鍾意食羊，每逢嬰兒滿月、入伙、結婚呢類喜慶場合必定食羊，有啲似中國人劏雞酬神。」愛羊，卻不愛豬，不過信奉回教的她曾破戒：「有次食咗先知係豬肉，原來豬肉係咁好味！會唔會再食？梗係唔會喇。」她直言「巴東印尼餐廳」出品正宗：「一道黑椒炒蟹，味道同家鄉有得揮，間舖大部份係印尼籍侍應，入嚟幫襯好有家嘅感覺。我最懷念故鄉Ambon嘅小食，好似用木薯粉整成嘅Zuami，個樣似飯糰，點咕喱汁食，咬落煙煙韌韌；用生粉及椰汁整成嘅甜品Papeda都好正㗎，可惜呢兩樣小食喺香港都食唔到。」
記者：區佩嫦 攝影：譚盈傑
用手點食飯？
印尼人習慣用右手進食，想飯粒乖乖放入口不會弄到天一半地一半，好有技巧。
黑椒炒蟹$148
Bella最愛的家鄉菜，可以一口氣狂掃整碟斤幾重炒蟹。肉蟹用指天椒、粗黑椒、蒜頭等炮製，甜中帶辣的醬汁能帶出蟹肉的鮮味。
咕喱魚頭煲$98
傳統的咕喱魚頭用紅斑頭，大廚改用肉質較滑的三文魚頭。咕喱汁用海鮮湯、香茅、辣椒、薑、檸檬葉、椰汁等熬2小時而成，酸酸辣辣送飯最正。
馬拉盞炒通菜$55
大廚自炒的印尼馬拉盞，用蝦膏、辣椒、葱頭、蝦米等，香口又不太鹹，配合入口爽脆的泰國通菜，堪稱絕配。
巴東印尼餐廳（28815075)
地址：銅鑼灣百德新街22-36號翡翠明珠廣場1樓1至2號舖