𠵱家嘅新樓，設計新穎，又有齊基本裝修同電器，買家都好受落，不過，蘭西近日就收到唔少讀者投訴，話新樓內櫳設計同隨樓附送嘅電器都好唔掂當，好睇唔好使。
讀者張先生同蘭西呻，長沙灣宇晴軒廚房嘅抽油煙機完全「冇料到」，吸力好弱，發揮唔到抽油煙嘅功能，張先生認為，雖則話係隨樓附送，但羊毛出在羊身上，發展商點都唔應該將貨就價。
至於住喺將軍澳君傲灣嘅鄭先生，就唔滿意屋苑嘅廚房設計，佢話有部份單位嘅廚房門，頂住雪櫃門，搞到每次開雪櫃就要先關廚房門，認真麻煩。不過，因為𠵱家嘅新樓，好似廚房咁，裏面嘅電器同設備都係定好晒擺位，業主如果想改動嘅話，都咪話唔大工程。
另一單比較有趣嘅，就係剛剛買入馬灣珀麗灣5期a兩房單位嘅胡小姐，佢簽晒合約，直至最近攞本樓書嚟睇，先至發現，浴室係冇氣窗嘅，呢個發現，對佢嚟講簡直係晴天霹靂，完全唔可以接受。
珀麗灣5期a浴室冇窗
蘭西曾經問過新地，佢哋解釋，為咗令單位嘅房間同客飯廳，可以享有更廣闊嘅景觀、更佳嘅光線，所以珀麗灣5期a有部份單位係將客、飯廳擺喺大廈外圍，而浴室就放喺內圍走廊位，正因為咁，呢類單位浴室不設窗戶。新地強調，浴室雖然冇窗，但備有足夠嘅抽風及照明系統，設計亦完全符合政府嘅要求。
老實講，自從政府早幾年修訂指引，畀發展商有更大嘅設計彈性，容許浴室不設窗戶後，好多新落成屋苑都有類似設計，珀麗灣5期a絕對唔係創先河。蘭西奉勸大家，如果大廈某啲設計、設備對你嚟講係好重要嘅，買樓前就要問多啲，仲要睇清楚樓書，以免後悔。
電郵地址：[email protected]
