陳太一日唔講自己下一步點行，尤其會唔會去選特首，相信香港傳媒都唔會放過佢，佢去到邊都會跟到實一實，務求搵到答案為止。好似噚日咁，啱啱陪完兩個孫女去倫敦參加夏令營嘅陳太，出席返港後第一個公開活動。大批記者，包括八方在內梗係聞風而至，睇吓陳太個核心小組有乜進展；可惜，佢只係話：遲兩、三星期講你哋聽呀！聽到八方個心囉囉攣，點解女人咁鍾意欲言又止引人遐想㗎呢？
陳太去到邊，都吸引大批記者前來；可能因為咁，搞到夫婿陳棣榮噚日都唔敢現身，否則以佢咁錫太太嘅性格，一定會陪伴在側。八方唔係誇大，有個曾經駐外嘅新聞官同八方講，真係親眼見過陳生陪陳太出訪時，晨早流流起身，周圍刮諸如粥粉麵油炸鬼等早餐畀太座享用，認真係廿四孝老公，難怪陳太至今都咁愛佢嘅另一半。
酒店房間門罅要夠大
講開又講，嗰位新聞官仲憶述咗一件關於陳太嘅得意事。佢話有一年陳太出外訪問，無啦啦對絲襪穿咗窿，但嗰個駐外辦事處入面，竟然無人知道邊度可以買番對絲襪畀陳太頂檔，搞到哩咁hea。結果啲駐外職員不容有失，先後做定research，搵定邊度有絲襪買，慎防出事時又不知所措。
另外一樣得意嘢，就係據知好多駐外辦事處職員，都好緊張官員下榻酒店嘅房間門罅有幾大，當然唔係要偷窺佢哋咁變態，而係啲職員通常要好早攞啲新聞剪報畀老闆睇，但又唔好意思吓吓敲門叫佢親自收喎；萬一老闆捲緊頭髮或者着住睡袍，你話幾唔好意思呢？所以佢哋通常一早會將啲影印本由門罅攝入去房就算。如果啲酒店房門罅唔夠闊，唔使旨意做政府生意喇。