關你車事：Joe'sFamilyTestdrive　全家試加Kit有驚喜唔薯嘜

相約Joe一家測試ToyotaYaris，你會問：「吓？叫個揸緊BenzC220嘅人去1,300c.c.日本細車？」
試車當日，Joe一家跟囡囡Jasmine朋友仔Hiram一齊出席，小朋友望見新車固然興奮，太太Sindy也讚車廂夠寬敞，Joe又點呢？「雖然只係1,300c.c.，但諗唔到佢竟然咁好力，加晒Original改裝配件，揸落嗰種感覺好似揸小跑車咁，有驚喜！」
記者：鄭達基
攝影：楊錦文

媽咪Sindy：無咁薯尾廂細

測試車廂，最好係搵懂得精打細算嘅女士們，所以我決定先問問Sindy覺得點。
「車仔細細，內櫳都好闊落，係尾廂細啲啫。Yaris係部細車，但係點都估唔到佢個車廂係咁大，就算全車坐滿人都唔怕逼，後排係平地台，舒適度比Echo好好多；但係佢個尾廂就似乎細咗啲，想擺件大行李落去都有啲難度，除非係將佢後排完全放平，咁咪擺到囉！」
「個Look已經Sporty，今次多套Kit，無咁薯㖭。老公都係咁講！Bodykit將車仔變成部小跑車咁，望落好型；不過，如果套軨可以換埋做Sporty嘅款式會更好。雖然我唔熟車，但細車出街一定要型，女仔揸車講襯㗎。」

爸爸Joe：力水十足拍住1.6走

「加咗原廠包圍嘅Yaris，外觀好似成部小跑車咁，只可惜胎軨個Look傳統咗啲囉！唔，車廂都OK吖，真係夠晒闊落，而且冷氣系統仲要係用旋鈕設計，我個人覺得方便過用㩒掣。呢部車仲加埋藍色腳底燈同合金跑車腳踏，Cool到爆！部車揸落嘅感覺唔錯，1.3偈配手波反應夠快夠直接，啱晒我呢類追求性能表現嘅車迷。」初時，我真係有啲擔心揸開大c.c.車嘅Joe，會揸唔慣只得1,300c.c.嘅Yaris；不過，試車之後，我得到嘅答案竟然係……「吖，部Yaris雖然只係用咗台1,300c.c.引擎，但力水十足，而且我試車嘅呢部係5前速手波版，速度快慢完全掌握喺自己手中，感覺同揸緊部1,600c.c.嘅車差唔多，唔錯唔錯！」
阿Joe，VVT-i可增加引擎低轉扭力，用5前速手動，起步當然比其他對手強。
「仲有呀，頭先揸部車嗰陣，我覺得佢套懸掛Setting啱啱好，唔太軟又唔太硬，過彎同行平路都好定；另外我又覺得車窗大睇位易，好啱女仔揸，連我太太都好認同㗎，哈哈！」