今個周末連場國際賽，咪一味向嗰啲一級強隊着眼，熱門好嘢推介各位睇實主場踢友賽嘅瑞士單Ｗ；冷門方面，歐國盃外圍賽作客球隊阿爾巴尼亞，孭住個4倍以上冷Ｗ，隨時爆出！華度
玩每一個遊戲，唔想輸，最基本嘅條件梗係要清楚知道遊戲規則；𠵱家嘅歐洲國家盃外圍賽，分組各球隊計算排名嘅制度，唔再係以前嘅同分球隊先計得失球差，而係先計同分球隊相互間嘅對賽成績。所以，呢輪秩序只係對住列支敦士登、盧森堡、安道爾等魚腩部隊嘅西班牙、荷蘭及英格蘭等勁旅，一陣計過數，又或者對手谷唔起佢哋戰意，係咁易「小勝」兩、三球，你玩「讓球主客和」，都可能激死。
揀魚腩拍跳提升士氣
唔係嚇你，荷蘭喺06世界盃外圍賽，已經試過對住安道爾，主場僅派4蛋，作客亦只係贏3:0而輸盤。英格蘭及西班牙令捧場客失望嘅例子，可能仲多！
要搵穩贏心水，唔向呢啲得嗰1.1倍以下嘅外圍賽強隊埋手，可以向友賽球隊出擊。好似因為成為08歐洲國家盃主辦國嘅瑞士及奧地利，周六亦同時有國際賽進行，尤其係主場迎戰南美球隊委內瑞拉嘅瑞士，捧場價值高得多。
瑞士呢幾年喺國際賽舞台表現愈來愈好，世界盃外圍賽及決賽周，都搞到一線球隊法國頭都大埋。由於係歐國盃主辦國關係，佢哋唔使好似其他球隊咁喺外圍賽打生打死，可以直入決賽周，但就要用呢兩年時間，操好隊波，提升足夠士氣，到時就可以喺江東父老面前，保住主辦國球隊嘅面子。
所以，呢輪瑞士搵嚟喺友賽「拍跳」嘅對手，都唔算係實力太強隊伍，好似上一個國際賽日，對手係「歐洲魚腩」之一嘅小國列支敦士登；今次就同都算係「南美洲魚腩」嘅委內瑞拉嚟切磋。
委軍近年戰績的確有啲進步，但大部份都係倚賴佢哋主場所取得；今次遠道而來到歐洲作客，全無優勢可言；陣中為港人熟識成員有兩個，包括踢緊馬略卡嘅中場艾蘭高，以及……曾效力南華，現於挪超聯落班嘅奧尼拉斯！
瑞士生牯仔愈踢愈好
瑞士方面，教練古尼今次就放棄徵召一班後生仔上A隊，放佢哋落去踢21歲以下國家隊；所以A隊大軍名單中，都係一眾經驗更豐富嘅當打好手，相信係畀呢班球員爭取表現，因為現時瑞士國家隊，好幾個正選位置都畀幾位後生仔，包括辛德路斯（目前喺度養傷）、比哈美、禾蘭芬等穩佔。呢場波一隊博贏，一隊又好似等輸咁，瑞士Ｗ分分鐘仲穩陣過嗰啲熱到燙手嘅強隊！
至於呢輪賽事冷選，可以吼實作客球隊阿爾巴尼亞。呢隊都算傳統歐洲魚腩部隊之一嘅球隊，最近呢幾年真係睇住佢哋進步，有球員可以外流到四大聯賽球會效力不特止，國家隊戰績亦逐步改善，再唔係十年八年前嗰隊出親都畀人炒嘅弱旅。
呢日阿爾巴尼亞喺歐國盃外圍賽，作客鬥實力都唔好得幾多嘅白俄羅斯，阿爾巴尼亞受讓，盤都嫌贏得少，博客Ｗ都得！
投資特攻隊金句
咪一味向嗰啲一級強隊着眼，一陣呢眾強隊計過數，又或者對手谷唔起佢哋戰意，係咁易「小勝」兩、三球，你玩「讓球主客和」，都可能夠激死。