今日係9月1號，對好多人嚟講，只不過係一個月嘅開始，又要捱足30日至有糧出，不過，對中原地產就有多一重嘅意義，因為佢哋將今日定為「中原日」，會搞好多活動慶祝。
點解中原會搞呢家嘢？集團主席施永青話，因為集團已發展成一個好大嘅機構，應該有一個紀念日，增加員工對公司嘅向心力，同埋作為一個周年開始嘅象徵，仲意味中原嘅發展踏入一個新階段。
點解要揀9月1號？施永青話，或多或少同中原喺78年下半年成立有關，實際係邊日就已經記唔起，但睇番7月1號係中共建黨日、8月1日就係建軍節、10月1號係國慶日，11同12月又近年底，所以把心一橫，就用9月1號啦。
施生話會以漸進式宣傳，潛移默化等同事了解呢日嘅意義。佢仲透露𠵱家由中原中國先做宣傳，然後由內地引導香港都跟住做。所謂宣傳，其實係回顧中原發展歷史，等同事認識中原係間乜嘢公司。