$1，跌咗都懶得執，因為$1買唔到啲乜，更遑論食到餐好。咁諗就錯，因為我又搵到超抵食$1膏蟹，仲係實牙實齒每人放低$1就可以落Order，唔屈甚麼人頭限制或最低消費。消夜時段仲有每碟$18小菜，叫5碟$90，加埋隻$1蟹先至$91（另收加一及茶芥每位$10），話晒都係酒樓，咁抵邊度搵？
記者：黃若茵
攝影：周旭文
模特兒：Irene
抵食啱夜鬼消夜
做推廣好多方法，有人畀幾萬蚊賣廣告，成效如何唔敢講，不過「花園酒家」就好醒目兼直接，簡簡單單推出$1蟹，問心，邊個聽到唔心郁郁？負責人麥先生話：「賣$1隻一定蝕㗎喇，來貨都要每斤$30，一斤先得3、4隻左右，仲要晚晚賣差唔多300隻，就算每次幾大量入貨都好，蝕梗。」計落，每隻蟹要蝕$7左右，仲未計燈油火蠟人工加工費諸如此類喎，唔食就笨喇！大廚褚哥仲講笑話：「老闆多錢吖嘛，蝕咪蝕囉。」除$1蟹外，消夜小菜都平到爆，每碟$18大大碟，消夜時段罐裝嘉士伯啤酒6罐$10，啱晒大班夜鬼消夜開餐吹水。
貴價海鮮都有得食
酒樓位置喺油麻地彌敦道，人流一定有保證，不過店方嫌只得港人幫襯唔夠，麥先生話：「平，唔止希望吸引到港人，我哋希望連自由行同埋外國旅客嘅錢都賺埋。」不過酒樓一味Sell平嘢，會畀人Cheap嘅感覺，所以貴價海鮮都一定要有，「酒樓有好多唔同品種嘅貴價海鮮，我夠膽講，嗰啲甚麼乜乜魚港都唔夠我哋多，$2,000條老鼠斑都有唔少自由行食㗎。」見到魚缸的確多靚魚，嚟到食$1蟹$18小菜唔夠喉，不妨叫條老鼠斑撐飽個胃啦！
1鹽燒膏蟹$1
炸熟膏蟹加蒜茸、亁葱、味粉調味，香到爆。老實講膏蟹雖然比較細隻，但打開個蓋有好多膏，食落肚個胃肯定無詐型。
2蜆芥鯪魚球$18
褚哥：「我用鮮鯪魚肉，加臘味、果皮、馬蹄呢類香口配料先搓再炸。」食落多陣臘味香味，口感彈牙又有馬蹄爽，唔錯。
3酥炸生蠔$18
本地生蠔大小算適中，肉質煙韌，唔會有外國生蠔咬落帶粉嘅口感。炸漿夠脆薄，好香，入口仲可以食到生蠔嘅新鮮肉汁。
4滷水大墨魚$18
墨魚滑嫩爽口，滷水汁調校得恰到好處，唔會太鹹，滷味師傅話個汁係秘製，唔講得點整喎！唔緊要，好味又抵食咪得囉。
5椒鹽沙鯭魚$18
褚哥：「要切走沙鯭魚頭同肚，因為呢啲部位唔好味，淨食爽脆滑嫩嘅魚身，椒鹽煮好香口，最啱送啤酒。」每碟10條，抵。
6蜜炙子薑雞$18
褚哥：「子薑係未發芽嘅薑，味道特別香，過埋呢個月時令就無得食㗎喇。雞肉我會用雞翼、雞髀、雞胸等唔同部位，食落無咁悶嘛。」
街坊出價：膏蟹值幾多錢？
$1，跌咗你都未必會執，$1膏蟹，講都未必有人信。派靚女Irene做街頭試食，街坊個個都唔信有咁大隻蛤乸隨街跳──
搵食攻略
花園酒家（26269908）
地址：油麻地彌敦道469-471號地舖
營業時間：6:30am-2:30am
交通：油麻地地鐵站C出口
座位：700個
人均消費：午市$30-$40，下午茶$25，晚市$80-$100，消夜$40-$50
最好賣：$1膏蟹，日賣300隻
註：$1膏蟹由晚市至消夜時段供應（6:00pm-2:00am），$18消夜小菜只限消夜時段供應（9:00pm-2:00am），優惠期即日起至9月7日
