周六、日主打國際賽，國際賽唔係成日打，過去威過嘅球隊，好易畀球迷較深刻印象，亦都較聚飛；希臘、瑞典呢啲明顯青黃不接嘅球隊，球迷仍然以最頂峯嗰陣嘅實力去評估，就一定蝕底。
如果畀着兩、三年前，摩爾多瓦主場對希臘，唔使問都捧客隊啦；不過今時今日，希臘明顯唔再係之前嗰隊嘞，進攻已經唔強，仲係靠喺阿積士做大後備嘅查列斯廸斯做箭頭，獨沽一味高空轟炸，連當打嘅森馬拉斯都冇徵召。後防更加得人驚，對住一向友賽唔認真嘅英格蘭，都可以輸4蛋。講真對摩爾多瓦就識極有限，不過睇佢哋主場往績，有迫和挪威及1球僅負意大利紀錄，「讓球盤」摩爾多瓦受讓半球/一球，博下盤。
巴西友賽當做騷
世界盃打入16強嘅瑞典，又係處於換血期，軒歷拿臣退出國家隊，要靠伊巴謙莫域入波，以佢上次幫國米打意超盃嘅表現，狀態真係麻麻；拉脫維亞上次作客俄羅斯，完場前一刻先失波，1球僅敗，今次回師主場，受讓半球，下盤可以追。
另外畀兩場平手盤大家玩，挪威沉咗咁多年終於復蘇，雖然作客匈牙利，平手盤仍然抵玩。而周日巴西對阿根廷，好似係一場大戰，不過巴西一向當友賽做騷，平手盤支持阿根廷。
文：牽牛