聯想、TCL多媒體同TCL通訊，早喺一兩年前，透過收購海外同業，晉身成為跨國企業，係國內企業「走出去」嘅排頭兵。不過佢哋嘅收購過程都荊棘滿途，甚至係血流成河，被所收購嘅對象拖累。
收購合併要成功，重點之一就係可以藉削減人手，精簡流程，嚟提高經營效益；當中一項最難處理嘅「棘手」問題，就係點樣處理歐美國家嘅貴價員工。剛公布中期業績嘅TCL通訊，能夠首次於今年第二季，將國際業務扭虧為盈，主要原因就係佢哋能夠順利咁搞掂呢班貴價員工。
TCL通訊高級副總裁AlainLejeune噚日喺業績發布會上話，佢哋嘅歐洲員工已由原來600人大幅減至𠵱家只有150人，因為喺歐洲嘅生產線同研發中心，都已經搬去中國；令經營成本大幅減少三分之二。佢哋辭去當地員工而冇引起大問題，係好彩得到合作夥伴Alcatel嘅配合，接收呢批富貴員工，如果唔係，喺歐洲咁保護勞工福利嘅國家，一定有排搞。
同鄉方法各異
同系嘅TCL多媒體亦收購咗法國湯姆遜（Thomson），但原有一班歐洲管理層未能將業績達標，主席李東生就借中期業績虧損高達16億元為理由，乘機整治佢哋，將管理層大執位，至於會削幾多員工，佢話正涉及法律程序，所以唔方便講。
至於被剔出藍籌嘅聯想，收購初期以穩住軍心為重，由原IBM個人電腦重臣擔任CEO，仲由呢位CEO承諾唔會裁員；點知過渡期一過，就換咗CEO，跟住管理層不斷出現人事變動。大家同鄉雖然方法各異，都係為咗同樣目標啫，但可見國企要晉身跨國企業，條路並唔易行。
李華華
[email protected]