香港曾經係英國殖民地，斷估英國餐廳唔少，但嚟咗香港8年嘅Richard就話：「喺香港，正宗英式食物真係唔多。」佢最近先喺蘇豪搵到間啱心水嘅英式酒吧餐廳，「我好鍾意嚟蘇豪食嘢，呢度同蘭桂坊唔同，氣氛Relax好多，感覺比較Warm。個幾月前見到『McSorley'sAleHouse』新開張，望吓菜單，終於見到我哋英國人必食嘅傳統FishandChips同埋牛肉批，好正。」拍照期間，佢望住個牛肉批猛流口水，睇嚟對牛肉批真係情有獨鍾。
英國人開餐梗唔少得啤酒，Richard話：「我飲慣比較苦味嘅英國啤，味道較一般啤酒濃烈，飲其他啤酒好似無乜味咁。」短短半個鐘，佢已經兩大杯落肚，依然面不改容，英國人酒量果然有番咁上下。雖然少機會食到家鄉菜，但比起倫敦，佢就話鍾意香港多啲：「喺香港，想做乜都可以即時做到，想出海咩，話咁快就可以去到海邊。食物都係一樣，除咗家鄉菜，仲可以隨時隨地食到泰國菜、墨西哥菜，乜菜都有得食。」其實講到尾，即係鍾意香港夠細囉，對外國人嚟講，揸車入元朗食碗涼粉都係好短時間啫。
記者：黃若茵
攝影：譚盈傑
車打芝士漢堡包$88
好大個漢堡包，不過Richard話咁快就食晒，除芝士同牛肉仲加入唔同香料，令包變得更香口，唔會一味得陣芝士味。
牛肉批$98
Richard：「酥皮要加入啤酒，食落就夠鬆軟。」西冷牛肉用紅酒、番茄燜，肉質非常腍，味道有啲似牛尾湯。
炸魚薯條$109
Richard：「傳統英國人一定食條狀薯條，薯塊、薯格都唔係我哋傳統食法。炸魚用嘅脆漿一定要加啤酒，口感先會鬆化，香港唔係好多餐廳曉呢個做法。」
McSorley'sAleHouse（25222646）
地址：中環蘇豪區伊利近街55號