兩年前，凱琪和文浩讀到中二便已輟學，以為此生與「學校」兩字絕緣。然而，今天開學日，他們決定穿上校服，踏進校門，重拾久違了的學生身份，迎接新學年的開始。凱琪和文浩是香港基督教服務處「有學返工程」今屆的畢業學員，他們連同另外八名學員已獲中學取錄，重新被納入教育網內。
年僅16歲、架着眼鏡的凱琪，一臉稚氣與羞澀，沒想到兩年前她因為學業問題，與母親「對着幹」，母女關係跌至冰點。
「每朝早我都鎖埋自己喺房，媽媽猛拍門叫我返學，我就坐喺床度喊。試過幾日都冇同媽媽講過一句嘢。」凱琪說。
凱琪是家中長女，尚有一名10歲妹妹，小學成績不過不失的她，升至中學便恍如患了「上學恐懼症」一樣，功課壓力令她透不過氣來，升上中二後情況變本加厲，凱琪經常藉詞身體不適而逃學。「有時一個星期只係返一、兩日，唔返學嘅日子就好輕鬆，咩壓力都冇。」
望有機會讀大學
凱琪坦言，母親由日罵夜罵到最後聲淚俱下叫她上學，她也不為所動，最終如她所願，中三讀了未夠半個學期便已輟學，自此過着「優哉游哉」的生活。直至半年前，她才如夢初醒。
「開頭幾個月好輕鬆，但慢慢就忍無可忍，唔明點解要搞到咁樣，好嬲自己浪費咗呢兩年時間。」
數月前，凱琪參加「有學返工程」，整個暑假差不多每天上足七小時的課堂，為今天正式開學升讀中四做好準備。
「最初都有啲唔習慣，不過慢慢就覺得自己真係想返番學，仲希望有機會讀到大學。」凱琪說。
18歲的張文浩，曾是反叛少年，他曾兩度重讀中二，自言被校方記缺點、小過的次數「多到唔記得」，兩年前，他因撕掉校章丟進垃圾桶而被趕出校，轉到另一中學，最終仍是無心向學，決定踏足社會做事，先後任職髮廊、洗車、侍應及跟車送貨，雖然賺得「世間財」，惟最後還是覺得讀書最好。
每晚溫書做功課
「跟車送貨做咗年幾，每月搵七、八千蚊，對我嚟講已經算好多，不過我眼見以前嘅同學𠵱家都讀到中五，但自己只係中二，我就問自己：『點解人哋可以做到，我自己就做唔到？』」文浩為了給予自己一個答案，選擇參加「有學返工程」，並順利完成面試，在新學年升讀中三。
「𠵱家每晚返到屋企第一件事就係做功課同埋溫書，唔明嘅話就去同學屋企一齊做，我𠵱家已經收拾心情，好期待再返學，希望可以讀到中五。至於阿媽，佢梗係想我讀書多過做嘢畀家用佢啦。」文浩笑說。
