勝獅（716）上個月22號公布中期業績，純利大跌61%，股價即日唔見15%，今個禮拜繼續散，噚日一度跌到3.85元至反彈，收市報3.99元，圖表上出現咗一支「釘」，𠵱家博唔博得過呢？
喺「香港一路發論壇」上，網友miracle話：「可以試吓撈底，但不需着急，因為主席在增持中，呢隻股票有一個特性，就係主席一增持，股價就會下跌，愈買愈跌。」佢建議參考3.50至3.70元呢個支持區，不過佢加句附註：「支持位是可以破的，因為主席仲增持緊。」對於點解主席增持股價會跌，miracle話：「真係無得解，呢個現象已出現3次以上。」
miracle所講嘅支持位，正好係勝獅舊年第4季嘅兩個底位，隻股已呈技術超賣，短期會有反彈，但以圖論勢，叻極都只係彈番上4.30元左右。
勝獅令捧場客失望，永義（1218）則令散戶激心，呢隻嘢耐唔耐就向小股東伸手，不愧為供股王，香港討論區有網友稱之為「老千股」，良丙勸喻小股東「供係必死，唔供只是重傷，當writeoff吧！」唉！有啲股真係唔可以睇表面數字吸引就仆入市，管理層死性不改，無謂對佢再有任何幻想。