牌面睇，永義呢間公司做成衣出口生意，應該好穩陣先係。不過事實上，任何時候持有永義股票嘅小股民，時刻都見到自己嘅財富俾人搣吓少啲，搣吓又少啲。前日，呢間網名叫「吸血供股王」嘅永義又宣布要供股，仲要「一供三」，有網友話︰「供又死，唔供又死。」利世民有時候真係懷疑，香港嘅所謂國際金融中心地位，究竟係笑話定係悲劇！
正確啲講應該係︰「供就一定死，唔供死少啲。」事實上，如果永義只不過好似「發三條二長生店」，歷史上只係非常偶然一次要小股東科水，大家都可能幻想吓大股東有大搞作。之不過，永義由97年至今十次供股，仲未計期間配股，已經抽水14億。問大家一條數學題︰1.如果一個股民響1997年8月用HK$62000賣入10萬股永義，以噚日收市價計，淨番幾多錢？
答案係︰HK$42.3！短短九年間，將公司99.93%嘅市值蒸發，之後仲要股民一供三，呢個係乜嘢世界？
不過可能有人會話︰「利世民，乜你唔係好崇拜自由市場㗎咩？若果真係有上市公司對唔住小股民，我哋有強大嘅傳媒同監管機構睇實佢哋，譴責佢哋！」
無錯，利世民係自由市場堅實信徒，所以見到官永義呢種當股民係提款機嘅行為，就要用孫柏文嗰句︰「篤爆佢」。免得自由市場之名蒙污，又或者俾官僚借機抽水。
而且所謂傳媒監察，都要睇吓係邊份報紙，如果好似我哋《蘋果日報》唔賣賬講真話，咁就當然會令抽水惡行無所遁形；只不過香港傳媒中確實有啲眼光有問題嘅股評人，偏偏叫人買向來管治有問題嘅公司，直頭好似當正自己係DistressedSecurities對沖基金，專點有問題嘅公司。根據利世民手上嘅數據，由3月至今，竟然有股評人多番叫人入永義（見表）。理由不約而同，話永義NAV有大幅折讓，甚至前日宣布抽水當日，仍然叫人犧牲，呢種眼光真係行內一絕。
當然，最佳嘅忠告，就係千祈唔好聽小道消息，又或者信講股佬亂講。講股佬要每日畀幾個冧巴，又真係好辛苦。不過，如果佢哋真係可以每日一中，唔使幾年佢就已經有錢過畢非特啦！試諗吓，當佢十次有八次中，贏嘅每次有5%升幅，輸嘅就15%自行止蝕，一年就有7倍回報，比起世界上最好嘅對沖基金好35倍。
咁掂，又使乜寫報紙專欄呢？
利世民