郭羨妮（Sonija）同張智霖、黃德斌噚日喺尖沙嘴宣傳新片《臥虎》。部戲未拍嗰陣，已經有傳殼王陳國強為咗捧佢，專登開部戲畀佢做女主角，起初仲有四大護法陪開工，點知冇耐就傳Sonija因為搭上馬德鐘，仲俾雜誌影到兩人同車而脫殼，四大護法即刻冇晒影。𠵱家就傳殼王轉捧啱啱加盟漢傳媒旗下嘅名模熊黛林，進軍娛圈。問Sonija點睇？佢笑笑口話：「真係？唔知，冇睇。我不嬲都話脫，好事嚟嘅！我𠵱家拍緊《學警出更》嘛！我都有客串演《生日快樂》，有份拍好開心。」
唔敢載男人
講到有雜誌話Sonija同馬德鐘拍電視劇《爭霸傳奇》一場咀戲時男方肉緊到啜唇，Sonija笑笑口答：「係咩？」輕輕帶過，仲乘機大吐苦水話好驚傳緋聞，又話：「我以後都唔敢車男人。」問佢𠵱家感情生活點？佢就話好恨拍拖，可惜真命天子仲未出現喎。
