你話XB360一味美式Game，打打殺殺唔啱你，不如試吓最新嘅《實況桌球》，不過唔係打「士碌架」而係你我細個都玩過嘅乒乓波！微軟喺旺角新世紀廣場擺下擂台，任人試玩對抽，《蘋果》更特別情商打遍省港澳、全國青少年男單冠軍陳亮，一心拉隊殺落去「踩場」，點知最後俾個7歲𡃁仔鍊低！
記者：許福合
攝影：陳偉強
少年波神齋㩒A
眾人殺到落去新世紀廣場，只見一班人圍住幾部《實況桌球》機座玩，大家正準備由第一部機開始「打番個靚莊」；起初面對啲十幾歲小朋友，男單冠軍陳亮都仲應付裕如，點知贏到最尾一部機座時，突感到一股殺氣，原來打Palyer1嘅𡃁仔Desmond已連贏多場，「片走」好多對手。面對高佢一倍嘅陳教練，佢居然面不改容地開戰，點知「盲拳打死老師傅」又再次應驗，小Desmond憑住齋㩒「A掣」神技，唔單止無打空、球球殺番過去，仲間中整幾個角度刁鑽嘅拉板，陳教練力挽下仍以1分之微落敗，可算無招勝有招！事後陳教練話玩家擊球無章法，失驚無神抽到個靚波，聽落似乎輸得唔多甘心喎！
貼近現實打波技巧
實地試玩咗成個晏晝，陳教練話憑住佢多年打波同教練經驗，已可從遊戲中人物嘅動作，推斷遊戲設計師必定對乒乓球有濃厚認識，事關陳教練話從電腦不起眼嘅細微動作，已可估計對手行動，更易掌握打波節奏，貼近真實打波差不多，即係話打得《實況桌球》多，漸漸地會掌握對乒乓球嘅深層技巧！
講番遊戲本身，開發商來頭都唔嘢小，Rockstar最出名傑作當然係大熱嘅《GTA》系列，更一度成為銷量冠軍，不過一直被批評意識不良，今次就可以話係洗底之作，轉而推出體育遊戲，比起之前打打殺殺嘅GTA自然健康好多。《實況桌球》其實亦都好有《GTA》風格，講嘅唔係玩法，而係人物設定總有《GTA》影子，加上喺新一代XB360推出，機能更非以往遊戲機能比，做出來視覺效果非常真實。
像真到會出汗
若然細心留意人物動作反應，更與電視上睇到嘅選手動作差唔多，加上19個不同場景，大大增加視覺變化。而比賽中途，球手更會有唔同生理變化，好似出力咁打咗幾場之後，就會標晒汗，衫都濕埋，可見設計細微之處。遊戲畫面除咗玩真實、效果逼真外，遊戲內角色其實都係真實中現役或退役嘅球手，同樣擁有豐富大賽經驗，各位可以喺遊戲內向他們挑戰。
世界球手3D化
陳亮教打波
一向少接觸電視遊戲嘅陳教練，認為《實況桌球》真實程度高，以佢多年打波經驗，都可一學即會，最花時間只係記清手掣上唔同按鈕嘅招式，幸好手掣設定相當好，能如實咁反映打波時旋球嘅運用，就好似拎住波板打一樣。陳教練仲教路，話好多現實打波技術都可以應用喺遊戲度；例如旋球之類基本技術，同現實一樣要掌握時間節奏，咁個波先會食得應！聽過教練指導，筆者落場打幾球，發覺時間節奏真係好重要，否則好易失身位兼Miss。遊戲發球時會出現一條Bar，以最高點開球，力度同準繩度就最高。發球好，就能有效箝制對手。
陳亮簡介
前國家隊及港隊成員，曾獲全國青少年比賽男單冠軍，省港澳比賽男單冠軍，多次獲得全港公開賽甲組冠軍。
PROFILE
遊戲類型：運動
對應機種：XB360
遊玩人數：1至2人（Live支援8人對戰）
開發廠商：RockstarGames
行貨售價：$299
