港股在期指結算日挾大成交突破阻力，日股昨日大升268點，港股好友自然不會錯過挾淡倉機會，將恒指挾上17392收市，幾日前好友垂頭喪氣，𠵱家應該信心大增。
不過，恒指升到呢個位，買恒指C輪P輪都欠值博率，17500阻力大，不易一攻即破，累積升幅大，可能先調整，但下面支持位近，可能跌唔夠100點已經反彈，暫時恒指輪諗唔過。連續兩日過280億元成交，好耐無見過。資金流入，要吼大隻股，恒指有機會破關炒上，由恒指成份股入手。
長實C輪3806：長實（001）昨日升破10日線，美國聯儲局上次會議紀錄講明要睇吓先，下次會議九成九唔加息，對地產股有利，長實短線有機會試88元。3806是眾多長實C輪的活躍分子，昨日成交1300萬元，輪價33仙，升18%，有效槓桿14倍，正股升1.29%，充份發揮槓桿效應，原因是對沖值0.54，剛轉入價內，好有吸引力，正股上到88元，3806可升到43仙樓上，35仙樓下買入，正股跌穿85.20元，止蝕。
思捷C輪2166：思捷（330）8月中升得好哋哋，忽然沉咗落10日線下面，呢個禮拜又爬返上嚟，走勢唔同晒。隻C輪2166昨收71仙，炒高7.5%，溢價1.97%，有效槓桿6.9倍，引伸波幅27.4%，有排先到期，數據吸引，正股下個目標66.80元（昨收64.70元），照計2166點都有兩成升幅，現價買番啲，睇85仙，正股若碌番落10日線（63.8仙）樓下，低過63.60元，沽出止蝕。
俊樺