喺8月尾9月頭，大學校園最Hit係賣手提電腦。點解係「賣」？因為啲學生真係「賣」嘢嚟賺錢！
睇睇網上IT論壇，最熱話題非出讓手提電腦Quota（配額）莫屬，事關每年例牌有大公司到大學做勁減促銷，學生有平價買機Quota，好似Fujitsu、HP、IBM等。除非想換機，或者係大學一年級生，否則都係用唔着減價Quota。唔少人興起「拎Quota」去賣！見網上呢邊有人話500蚊乜乜大學手提電腦Quota一個，另一邊又話400蚊賣畀你；有啲仲勁有誠意，教埋你即場用中銀或東亞簽卡，有免息分期㖭。不過筆者見過有位讀設計嘅學生問：「有冇MacBookQuota出讓？」結果DeadAir幾日都冇人回，事關Mac機根本唔會喺大學做減價。
見呢位冇人回嘅學生咁慘，有好心人出咗另一段Post話：「又一城同時代廣場做緊MacBook減價，送埋2GBNano，持學生證仲有優惠。」不過減價做到9月3號，讀設計又想買MacBook嘅學生，快手喇！
記者：陸俊雄