施丹喺世界盃決賽周頭撞馬特拉斯，這次驚世舉動當然令外界對他的形象帶來不少負面評級。不過，呢位法國球王最近決定放棄同皇家馬德里最後一年合約嘅600萬歐元年薪（約6,000萬港元），就真係充滿球王風範。
施丹同皇家馬德里簽訂合約到07年才屆滿，雖然已經宣布退出球壇，但根據合約條款，施丹唔需要上場比賽，都仍然可以獲得最後一年嘅600萬歐元年薪，而佢決定主動同皇馬簽訂一份協議書，以表明唔會領取呢份薪水，唔希望不勞而獲。
唔希望不勞而獲
施丹今次咁做亦得到皇馬喺官方網站，以及西班牙報章《阿斯報》嘅高度讚揚，認為呢種行為堪稱典範，表現出世界球王應有尊嚴，不貪圖金錢。協議書中亦提到，如果施丹有朝一日破戒復出球場比賽，都只會為皇家馬德里披甲，絕不會替其他球會比賽，避免損害皇馬利益。
正在度假嘅施丹預計到聖誕節時先會再回到班拿比奴，現任皇馬會長卡達朗就希望施丹出任球會形象大使。不過，另一個流傳講法係擔任皇馬青年軍教練，如果真係出任教練，相信以呢位世界球王嘅號召力，肯定吸引到大批青年人報考加入皇馬拜師學法，成為皇馬另一特色。
「對於球王施丹嚟講，600萬歐元當然唔算係一個大數目，但唔再代表皇馬上陣就決定唔攞最後一年薪水，唔希望不勞而獲嘅心態的確值得其他球員，甚至青年人學習，我求大俠亦希望施丹今次行徑可以為佢『世盃頂人』事件攞番唔少分數。」