近期屢有證券行「爆煲」，雖然唔關「齋管」銀行一瓣嘅金管局事，但以維持金融市場秩序為己任嘅任總裁，目光當然唔會咁狹窄，淨係滿足於銀行業嘅穩定。過去任總亦曾經喺立法會，同金勞詹就金融中介機構──亦即係經紀行，喺賺取利潤同埋影響金融市場穩定之間嘅矛盾上，進行舌戰。
噚日，任總喺佢嘅專欄《觀點》內，又再用呢個課題發表偉論，雖然佢老人家冇指名道姓，提及近期連串出事嘅證券行，但字裏行間，不難發現若有所指。佢話，國際金融中心維持金融體系穩定非常重要，但金融中介機構，喺力求賺取最大利潤，滿足自身利益時，有啲做法唔一定符合公眾利益。因此市場要提供高效率嘅金融基建，好似貨銀兩訖，即一手交錢一手交貨，防止呢啲金融中介機構詐騙客戶。