有意大利浪人之稱嘅前鋒韋利，日前落實加盟意甲阿特蘭大簽約一年。喺球壇打滾咗10幾年嘅佢，話晒都曾經叫做世界級前鋒，但韋利嘅月薪竟然得1,500歐元（約1萬5,000港元），係意甲聯薪酬下限最低嘅人工，唔好聽講句，真係唔少香港嘅打工仔隨時都搵多過佢。
另加出場費入球獎金
不過我求大俠認為韋利身家已經好鬼豐厚，今次佢加盟阿特蘭大肯定唔係為錢，係對足球仲抱有熱誠。球迷唔好覺得阿特蘭大咁刻薄，事關佢哋又唔係大球會，有錢極有限。但係阿特蘭大都衰唔晒，聽講月薪1,500歐元只係韋利嘅「底薪」，如果佢每踢多一場比賽，入多幾球波，人工方面又會加啲。
諗落求大俠又覺得唔係幾對路，韋利近年產量下降，又成日因傷冇得落場，呢啲額外嘅花紅好可能得個睇字，韋利隨時只可以「咬底」收千零歐元一個月，諗真阿特蘭大又幾識計數喎！
韋利轉會次數仲多過成個禮拜嘅沖涼次數，喺99/00年球季，佢更由拉素轉投國米破咗世界轉會費紀錄。當年嘅韋利，喺求大俠心目中肯定係全世界最好嘅五名前鋒之一，𠵱家韋利重返舊會阿特蘭大，睇怕都係最後一間球會喇啩！求大俠喺度祝佢事事順利啦！
「1,500歐元月薪都唔夠韋利同女友食飯睇戲，我求大俠肯定佢今次加盟阿特蘭大唔係為錢，不過韋利最好操fit體能同減少受傷，唔係球迷都好難再喺電視機前睇到佢落場入波。」