恒生噚日趁旺角嘅旗艦店裝修竣工，正式公布全線分行「換新衫」，轉過晒新look，等呢間有七十幾年歷史嘅銀行，睇落後生同活潑啲，順便吸納年輕客擴大客源。咁大件事，一眾話得事嘅高層，好似柯清輝、梁永祥、薛關燕萍、個女會考攞咗10A嘅劉順詮、潘仲賢等，都有到場主持大局，再加埋風之后李麗珊同OTO老闆葉志禮做嘉賓，又有醒獅來朝，塞滿成條彌敦道。
為咗加深大家對新look嘅印象，恒生公關出盡法寶，幾乎將所有食物、飲品同埋裝飾擺設，都整到綠色及四方形配合主題（圖二）；就連紀念品，都係印有新logo嘅四方形「讀卡器」。
柯大俠同華華講，平日除咗巡舖之外，都好少會落旺角，所以旺角班女同事難得見到老闆，大家都好鬼興奮，企晒喺門口吼實柯大俠同梁永祥，一見佢哋準備離場即刻蜂擁而上，捉實要影大合照，兩個高層艷福不淺，梗係笑騎騎任影唔嬲啦，氹到班同事不知幾開心。
查實呢個換新衫嘅行動，恒生5月已經開始進行，今次搞到咁大堆頭，主要係第一間旗艦店出籠，其次係由噚日開始，所有分行都會陸續換晒新裝。華華知道呢間位於旺角嘅旗艦店殊不簡單，客戶層面之廣，可以話冠絕一眾分行，有三山五嶽嘅客，本簿仔有成4億嘅豪客都有，真係唔講得笑！