詹培忠乖仔詹劍嶠做主席嘅建星環保，近期變身能源股，向澳門商人林南買入一家持有汶萊油井勘探權嘅百田國際能源公司兩成股權。該勘探項目本周一喺汶萊簽約，詹培忠都去捧場。呢單交易仲做埋當地報章頭條，因為係汶萊首次向海外財團批出勘探專營權。
據汶萊提供嘅資料，今次獲批勘探權嘅公司，係百田同中石油旗下公司分別佔七成同三成股權，中石化集團亦會協助提供技術，可能因為有咁強嘅中方背景，汶萊至肯同佢合作。不過計落，建星只有嗰間石油勘探權益公司8.4%，唔算多，建星當然想攞多啲，聽講有意透過向百田發行可換股債券，間接增持油井權益，但對方是否賣，則要問過林南。
林南話，同詹培忠合作，係睇中佢幫國美借殼上市單刁咁成功，但百田會否借殼建星，咁長遠，又點話得埋。