八方日前遇到體育學院主席李家祥，問佢近況如何？李主席話，前排北京奧運馬術項目嘅首腦嚟過香港，睇到體院改建工程進展順利都話好滿意。李家祥仲話，年底啲運動員會去到烏溪沙練習，又讚嗰邊設施更新，周圍環境又唔錯。佢奉勸啲運動員最緊要記住：「集中精神，提高水平，將來為祖國同香港爭光！」真係政治正確。
搞奧運馬術賽，要好多人幫手，李家祥話，仲好積極咁請人，直情係如火如荼。佢亦提及兩年後奧運嘅義工問題，希望香港市民全力支持，相信會有好多人想為奧運獻一分力。目前佢哋以高年級學生為義工目標，因為招待來賓始終都係大個啲嘅好，實際所需人數就未定。