大家都知，孫柏文對花旗國樓市睇得相當暗淡，其實花旗國嘅財經口水佬好多都睇淡，知道泡沫爆破，亦好似我哋特區樓市受到八萬五洗禮嘅時候，有好多人出嚟獻計托樓市。其中一條橋，孫柏文都想同大家講吓，就係有人動用花旗國嗰種類似特區強積金嘅退休戶口（retirementaccount，本身只准用嚟投資作將來退休嘅保障，如果提早攞就會俾人抽稅同罰錢），畀人喺退休戶口攞錢出嚟買樓，仲大條道理話買樓都算係投資項目。
究竟work唔work就唔知嘞，話說當年特區政府都諗好多呢啲「高明」招數，例如首次置業貸款、將居屋計劃長埋黃土，到後來董特首學啲中央銀行家咁出口術，憑一句：「八萬五已經唔存在喇……」重振世界投資者對特區樓市嘅信心！成功與否，大家心中有數，孫柏文淨係知道，我哋特區煤炭銷量節節上升，唔怪之得能源股咁勁啦。
潛質學生 值得一搏
不過，花旗國口水佬話買樓係投資我都同意，如果特區都可以用強積金買樓，總好過強迫大家買埋啲白癡基金，眼白白睇住佢哋買8號仔。我就話，其實如果可以買樓，不如畀人投資喺教育，例如交學費讀書咁。自己唔想做高齡學生又冇仔女？唔緊要，可以睇吓隔籬屋順嫂個仔有冇潛質平步青雲，如果係讀書嘅料子，不妨借錢畀佢交學費，一個唔覺意，做咗10A狀元（雖然就嚟通街都係）……嘿嘿，將來就係佢回報嘅時候。如果順嫂個仔唔啱，仲有陳太個仔，會考得12分唔緊要，識得發明嘢一樣有大學讀。講到呢度，一定有人質疑：咁風險咪好大？唓，風險大得過買8號仔！
提起陳易希，今日孫柏文同老竇食飯，佢好疑惑咁問：「個歌手做乜鬼走返去讀書，仲要俾人鬧佢會考得12分，唔夠quali。」我就問佢係咪講緊陳易希，讀科大？個唔係陳冠希。點知我老竇答：「我邊係講緊陳冠希，我講緊陳奕迅。」……唔好以為孫柏文吹水，我老竇真係咁講！
《信報》副刊 中學yearbook
業主一聲迫遷，搞到孫柏文呢排忙住收拾細軟，結果，好多曾經消失於神秘百慕達三角嘅物件，得以重見天日。好似陳年舊VCD，仲有已經唔知邊個送嘅禮物。
不過，有一件就搞到孫柏文好鬼感觸──以前中學嘅yearbook，尤其係中七嗰年同學嘅「遺言」，大家都寫晒勵志說話，例如：孫柏文唔好再講股票貼士呃人啦；好彩走得快，新校長好廢呀；文人辦學年代過去之類。睇睇吓，孫柏文忽然覺得嗰份淡淡哀愁有啲似曾相識，甚至好似日日都感受到，但又講唔出喺邊度嚟，愈想愈魂遊之下忽然肚痛，順手攞份《信報》副刊入廁所……一睇，噢，終於知道嗰份感覺從何而來。
孫柏文