古巨基隻新碟《Human我生》推出之後反應唔錯，唱片公司話出咗三日，定單已經有金唱片數字（25,000隻），難怪基仔好興奮，前晚特登請咗新碟美術指導林海峰（Jan）拉隊食飯慶功，同場仲有一班有份演出基仔執導音樂電影嘅好友，包括陳國坤同周慧敏。
被嘲催淚導演
基仔多謝班老友參演佢部音樂電影嗰陣，同樣有份演出嘅阿Jan就唔多高興，佢投訴話：「嗰陣我排緊軟硬演唱會，你叫我幫手拍嘢，我都一口應承，仲話有好多女仔參演，有Vivian（周慧敏）、又周汶錡又Miki（楊愛瑾），點知全部對手戲都要對住你，連講情深對白都要望住你，好嘢你就留番畀自己，係咪搵笨？」
阿Jan詐型，基仔只好安撫佢話：「唔關我事，劇本唔係我寫㗎，我同啲女仔都冇親熱戲，我只係叫佢哋個個都要喊，最多再搞嘅話安排番你同啲女仔合作囉！」
事後基仔話戲裏面個個女主角都要拍喊戲，搞到佢俾工作人員取笑係催淚導演，好彩成套戲都拍得好順利，只係其中一位model女角Marian因為未拍過戲，唔識喊，基仔就叫佢諗番同男朋友分手嘅情景，果然即刻喊得出！
