經紀黃昨日講到百盛（3368）配售舊股受到芬佬歡迎，雖然隻股昨日復牌股價下跌，但睇嚟佢講法冇錯。
百盛昨日有成5520萬股，每股造24.2元的大手成交，相信就係配股上板，根據前日所講嘅配售資料，今次配售係以最高位定價，而配售代理連超額配股隻「綠鞋」都拎埋出嚟，反映芬佬今次認購確係好踴躍。
經紀黃話，呢排冇乜嘢好炒，而芬佬又放完暑假陸續返晒嚟，所以有批股集資活動，佢哋點都會要番多少貨。佢仲話，當百盛股價穩定番，可以考慮上車。
百盛昨日復牌，一度低見24.45元，收25.30元，下跌2.69％。
另外，早兩日講到通達（698）中期業績會靚仔，昨日開出嚟，盈利增長61.2％，賺7334.5萬元，兼夾有中期股息0.8仙，算係對辦，所以隻股昨日抽高10.84％，收0.46元，又係52周高位，成交股數2026萬股，金額901.4萬元。
慕容小初