期指結算日，淡友個頭挾到扁扁哋，恒指一升就係201點，中移動（941）、中銀（2388）與滙控（005），總共貢獻98點，着咗1半。
8月期指既然已經埋單，睇期指，當然要睇9月期指。9月低水11點，要調整藍籌除息對指數實際有幾多影響。9月份已知除息同除淨嘅藍籌，總共有9隻，總共會拉低恒指80點。計入呢個因素，9月期指實係高水69點。炒期指與炒恒指輪者，要睇埋呢個數。
建行C輪4556：中資銀行股昨日最靚係中銀，彈升3.6%，估計其他中資銀行股亦會有少少運仔行，吼建行C輪。想出手快，收手亦快，諗4556。隻輪10月初夠鐘，輪價12.9仙，溢價0.9%，槓桿率26.2倍（有效20.5倍），引伸波幅14.4%。正股唔派息，唔使理除息因素。另1隻熱門C輪4578，輪價11.9仙，壽命比4556長1個月，但溢價則高2.9個百分點，咪搞呢隻。
交行C輪4657：博交行（3328）又係有啲運仔行，短炒C輪4657。隻輪10月初到期，輪價21.5仙，溢價2.1%，槓桿率22.8倍（有效14.9倍），引伸波幅21.9%。另1隻熱門貨3585，壽命長啲啲，但溢價又高啲，拍埋4657，都係輸蝕，咪搞呢隻。
章盛