寫稿之際，老友C來電，竟然係人在悉尼，特別打電話嚟問：「喂，你以前寫過，澳洲有隻襪，值得男士買，究竟係乜嘢牌子？」左丁山一時間忘記咗，惟有搵番舊稿，搵咗近半個鐘頭，先至打電話覆番佢：「叫做ComputerSocks。」
過咗三十分鐘，老友C又來電：「喂，卒之搵到嘞，你報錯料，好彩售貨員心水清，佢記得個牌子係HoleProof，生產咗幾個系列嘅男士襪，其中一個系列就係ComputerSocks。所以下次你要講清楚畀啲朋友聽，係HoleProof嘅ComputerSocks呀！」
老友C呢輪好得閒，去完加拿大美國旅行兩個幾禮拜，返香港住咗幾日，又走咗去澳洲疏扶，羨慕死左丁山，自己想走開一陣，冇法子走得郁。遲啲馬季開鑼，仲忙多啲。
應付完老友C，寫字樓樓上有醫務所搞緊裝修，正在掃灰水油漆，啲天拿水味傳到落嚟，害到左丁山咳個不停。普通乳膠漆帶有濃烈氣味，十分刺激味覺及喉嚨，老友披圖梁最講究化學製品之毒性，佢話裝修完畢，要等間屋或寫字樓啲油漆氣味冇晒，為時一至兩個月，先可以入伙，以避免吸入毒素，但香港啲租金咁貴，邊度有租戶可以丟空間屋或寫字樓兩個月呀？披圖梁話另一個辦法係用環保油，氣味似有若無，衞生好多。顧問S聽佢講，裝修屋企用環保油，但裝修佬話價錢起碼貴百分之二十至三十，而且環保油難亁，開工要多十日八日，計起嚟又係錢，於是選用環保油變成一個健康vs金錢嘅問題，兩者之間，請你選一樣，健康係要用金錢買番嚟嘅。
住屋或者會選用環保油，寫字樓裝修以快為尊，邊度會考慮到健康問題吖。人哋吸煙，我哋喊打喊殺，話二手煙會害死人，但「二手油」呢？冇人理噃，左丁山諗起要聞二手油一至兩個禮拜，耳仔邊即刻痛。醫生醫務所裝修都唔用環保油，可見凡事掂親荷包，永遠荷包行先，餘事好閒啫。