馬會今日開周年大會，夏佳理篤定退休，並追隨舊制唔做董事。主席一位陳祖澤十拿十穩，因為佢哋論資排輩，向無爭議。陳祖澤現時係副主席，本身係九巴董事長，之時係政府官拜教育統籌司，出晒名係計仔多，八方甚至聽人講過佢本來有機會做特首㖭；所以佢領導馬會一定冇問題。要佢落選，除非個遴選標準改咗用「高矮」定輸贏。
在夏叔之前，馬會主席比較高高在上，夏叔上任後作風親民開放，口碑非常好，有人擔心陳祖澤比較保守，八方又覺得未必，其實佢都好玩得，例如佢公開講「花仔笑話」自嘲身材，就證明佢並非古肅之人。（個笑話係：陳祖澤矮，佢話自己結婚時，拖住新娘在前面行，後面有姨媽姑姐竊竊私語：咦，點解個花仔咁高嘅？）
除咗主席，馬會仲要選兩個新董事，以填補夏佳理同鄭明訓空缺。如無意外，陳南祿同利子厚會順利當選。馬會所謂選舉，其實甚合國情，遴選全員由董事欽定，董事就由遴選會員選出，所以如冇董事會祝福，唔使旨意選得到。就算唔係等額選，都永無爆冷，大家仲記唔記得簡文樂當年嘅遭遇？
陳承楷可以睇高一線
利子厚係希慎嘅後人，世家子弟。陳南祿係國泰紅人，太古代表。前者冇乜好講，後者值得一提。馬會回歸前係皇家嘅，英資勢力絕對，除咗滙豐，怡和好活躍，大班紐壁堅都做過主席。太古就絕少參與馬事。時移世易，怡和在香港淡出，馬會只剩一個將退休嘅郭勤功，現在加入陳南祿，去年國泰又大手筆贊助賽事，可視為怡和去太古來嘅徵兆。話唔定十零年後，陳南祿會係繼陳祖澤之後第二個姓陳嘅馬會主席。
主席篤定，董事冇爆冷，行政總裁呢就有啲暗湧，個五人選拔小組唔知擇定未。夏叔同現總裁黃至剛唔啱Key已是公開秘密，所以黃明年一月要退。但新人選中，早前傳過嘅鄺其志俾人放冷箭，應家栢同澳洲佬都唔係本地人，蝕底少少。最新吹出嚟嘅風係現任投注事務執行總監陳承楷，聽講佢識馬又識波，好啱用。八方噚日在跑馬地會所見到陳總監在馬會大公關陪同下請傳媒食晏，笑容可掬，紅光滿面，真係要睇高一線。