香港有份協辦奧運馬術，真係要做得好好睇睇，為國爭光至得。八方喺呢方面唔擔心，事關佢哋有林煥光（WK）做行政總裁，應該唔會差得去邊。
聽講WK都好熱愛呢份工，除咗唔介意周圍飛（例如啱啱喺德國返嚟，下個月尾又可能去比利時），四處取經之外，更加唔介意無專車接送，自己搭地鐵去實地考察。八方都見過佢喺地鐵站流晒汗咁跑去活動地點，認真辛苦。如果可以，真係畀架車佢好啲噃。
𠵱家奧運馬術公司大概有18個職員左右；估計到下年8月就有成100個人，陣容好龐大。據知𠵱家office入面好多嘢都係用贊助品，例如飲嘢要飲可樂、飲水要飲可樂公司出品嘅飛雪、電子產品就要用Panasonic樂聲牌，連飲酒聽聞都要飲「長城牌」，真係日日俾贊助品包圍。WK都係時候要練定酒量，以後北上同奧組委傾嘢都唔驚醉嘛。