「學生哥，好溫功課，咪日日掛住踢波……」係呀，又到開學喇！聽日就係各位學生哥嘅大日子──開學日！開學前夕當然要「執番身彩」，熨好校服精神奕奕咁返學上堂。唔好以為熨校服好易，就咁用熨斗熨，分分鐘熨衰咗件校服返唔到學！所以學生哥要留意以下小妙方，留個好印象畀老師與同學呀嘛！
記者：葉雪芯
攝影：周旭文
模特兒：Eric，Kathy（Startron）
女同學 裙薄墊住熨
直身裙
毛巾墊旗袍
旗袍款式或一般直身校裙最易處理，由領口位開始一直熨就得。惟注意校裙質地通常較薄和輕，宜用低溫兼且最好係鋪一條毛巾墊住，咁樣輕薄嘅校裙亦唔易留有熨斗印。
高位噴水
要熨呢啲咁薄質地嘅裙，最好喺熨之前用水噴一噴先，濕濕哋咁熨，會易啲熨直㗎！但噴水都好有技巧，最好將噴壺舉高少少，過心口位置，咁樣水先會均勻地噴落裙身，無咁易留下水印。
用熨斗套
女仔校裙比較薄，熱力好易分散得唔平均，就會留下一大個熨斗印，甚至一個唔小心仲會就咁燒焦㖭！所以最好就用熨斗套套住熨斗，咁熱力會均勻啲！
百褶裙
衫夾定褶位
校裙就零舍多褶，即使非百褶裙亦或有褶位，用衫夾就可以一勞永逸。將衫夾夾住裙褶尾部，作用係可以定位，唔怕第一褶叠住第二褶熨到亂晒龍！
腰間熨下去
腰間位置向裙尾順熨下去，咁啲褶位就會直得好自然，又唔會起皺㗎喇！
男同學 領位「恤」先熨
恤衫
領位由外至內
恤衫熨來熨去皺過皺皮，尤其係領位，總係熨唔挺！其實只要由兩邊開始熨入中央位置，順番佢嘅紋路同摺位，咁就可以熨到好靚仔。
唔好熨鈕
鈕嘅位置就最蝦人熨，但千祈唔好就咁成個熨斗壓落鈕度，咁好易將粒鈕熱到溶㗎！方法是用鐵茶匙蓋住鈕，然後熨側邊位置就得！
推出熨好部份
咁辛苦熨好件衫，就梗係唔好再整皺佢啦！所以最好就將熨好嘅部份推出，唔好向自己方向。
西褲
記得反面
西褲最棹忌熨到起晒鏡面，為咗避免有呢個情況發生，就要反轉個褲管用低溫熨裏面。
隔住網熨
即使熨裏面都唔想起鏡面，咁最好就用熨衫專用嘅網狀布墊住，或者DIY用舊嘅洗衫網剪開攤平，變成一個熨衫網，隔一隔啲熱力，熨得直之餘又唔會起鏡面㗎喇！
校呔
紙筒熨呔
校呔質地多數是絲質，所以要用低溫慢慢熨，想條呔直得嚟又自然啲唔好硬邦邦，可以利用廁紙筒捲起條呔，用熨斗按實呔嘅一端，紙筒慢慢向後拉住咁熨。
擦鞋仔有幾難？
觀音頭又點可以配掃把腳？放咗假咁耐，皮鞋難免會有啲潮濕霉味，要急救，其實只要用報紙塞入鞋裏面，然後放喺風扇前面或者通風位置吹過夜，但千祈唔好貪快用風筒吹亁佢，否則易令皮鞋面亁裂，然後塗一層薄鞋油擦令皮鞋，塗時避免把鞋膏直接搽在皮面上，應先塗於鞋布或鞋刷上。
媽子教落：掟彎熨校徽
1.唔好熨校徽
小記以前試過高溫一壓落個校徽度，結果……個校徽咪「皺晒眉頭」囉！所以校徽千祈唔好直熨落去，「掟個靚彎」避咗個校徽，熨側邊位置便可。
2.熱力對號入座
熨衫最重要係注意溫度，一般而言，熨斗分為高（3點火）、中（2點火）、低（1點火）3種熱力。絲質、裡布用最低溫；混合纖維或其他一般衣物用中溫；有濕氣的純棉、麻質布料才用高溫。
3.熨板測溫
拿熨斗時，不要反手拿，因為一不小心，手指關節會觸碰到溫度掣，把溫度調高。在熨衣前，最好先把熨斗在熨板上熨一下，然後用手掌按按被熨過的熨板，試試溫度是否適合。