連續大升兩日，恒指再逼近17300點大關，並一舉而升破10日線（17107）同20日線（17142），短期整固若能守穩在兩線之上，後市可進一步造好。
內地房產股個別發展，中國海外（688）同越秀投資（123）表現最突出，中海收5.40元，升0.13元，升幅2.46%；越投掃到1.48元高收，升5仙，升幅3.49%。
越投噚日成交大增，有4900多萬股，而再對上兩日成交都只係800萬同1300萬股，今次以大成交而拋離3條短期平均線，只要升破前高位1.49元，中期上升大浪即可確認。
本月中曾推介越投（當時股價1.41元），話佢係暗室中的巨鑽，只要放在陽光下，就會光芒四射。越投幾時發光，就要睇基金幾時郁手，佢哋家吓仲一路係咁收集，只要買夠貨，越投大升浪就會開始。越投一向係慢熱股，但不動則已，一動應該會驚人，短線有機會重上5月高價1.95元，以1年為期，目標價係2.90元。
越投快有大升浪
講番中海，最近宣布嘅中期業績，幾理想。06年（12月年結）的上半年，營業額36億元，升31.9%；盈利3.52億元，升48.0%；每股盈利13.26仙；中期息4仙，升33.3%。
中海係基金愛股，業績宣布後，大行都給予正面評價。大摩再度將中海引入研究股份，並給予「中性」評級，目標價5.80元。花旗集團維持中海的「買入」評級，目標價6.15元。國泰君安指樓價持續上揚及新增土地儲備令中海估值提升31%至6.30元，維持「買入」投資評級，目標價亦為6.30元。
中海係內地大型地產發展商之一，業績顯示受宏調影響不大，事實上，宏調已為內地房地產行業發展帶出新格局，優勝劣汰，中海反而獲得新的機遇，優勢會更為明顯。基金揸重貨，不會無因。
中海今年新購10幅土地，新增可建樓面面積296萬平方米，使總土地儲備達到1255萬平方米，足夠未來5年發展之用。集團有信心今年可完成168萬平米的銷售目標，套現約120億元。
中海由5月開始形成大圓底收集形態，升破5.43元即可確認收集完成，照度上去，目標價係7.05元。
郭兆誠