問心，對沙灘小食亭有沒有期望？買到隻有滷水味的滷水雞髀、啃到件並非茸茸爛爛的三文治，已經要劏雞還神。愛四處尋吃的楊思琦，居然介紹到間能提供即叫即製薄餅的小食亭，佩服！更要佩服的是餐牌上那六個字──「唔好食，可退錢！」不好吃真的可以退錢？答你，是真的，靚太同事伊琳試換Pizza，對方確無耍手擰頭。
記者：區佩嫦
攝影：伍慶泉
Hair：BenLam@IlColpo（IFC）
楊思琪愛薄批
楊思琦愛駕車到赤柱「鬼佬小廚」小食亭歎Pizza，坐在露天位置Take個Break，吹海風180度近距離飽覽泳灘，完全把倦意吹走。別以為嬌滴滴的思琦細食，原來她是個Pizza殺手：「我好鍾意食Pizza，特別鍾意食味道較濃的辣肉腸餡，試過一個人將成個細批食晒咁滯，以前鍾意食厚批，𠵱家鍾意食薄批，因為薄批無咁飽，咪可以一次過食多幾塊囉。」
一般Pizza店的批底用機器製成，厚身之餘入口亦較嚡口，小食亭兩位法籍老闆堅持用人手製，手製批底入口香脆又有嚼勁，厚度在3mm至4mm間，完全符合楊思琦心目中的薄批指標。職員周先生話：「我哋的批底由大廚一個人搓成，佢每個星期要不停『騎馬』（搓餅），每星期大約可以搓到200個，不過通常逢星期日下午已經賣晒，有時要臨急臨忙趕工。」楊思琪大讚這份誠意：「小食亭有得食HomemadePizza已經好驚喜，雖然款式唔多，但全部即叫即製，等5至10分鐘就有得食，呢份誠意已經攞滿分。聽老闆講，呢度夜晚仲提供烤肉同芝士火鍋，下次有會機會一定要試吓。」
1. 9吋蝦蘑菇忌廉汁芝士薄餅$85
市面罕見的白Pizza，用新鮮忌廉代替茄醬，加Mozzarella、Asiago及Parmeson三款味道濃淡不一的芝士，香濃芝士味配淡味鮮忌廉，一淡一濃更能夠吊出蝦的鮮與蘑菇的香，不過口感較膩，宜一件起兩件止。
2. 16吋辣肉腸芝士薄餅$146
自製茄醬是這Pizza的賣點，番茄烚個多小時，打爛加入調味料及香草再煮，茄味濃郁絕無味精，配惹味辣肉腸及香濃芝士，楊思琦也吃得食指大動。
3. 紅酒燴牛肉螺絲粉$69
用紅酒、自製茄醬、紅蘿蔔、洋葱燴牛肉個半小時，牛肉腍而不嚡，醬汁味濃不鹹，最欣賞螺絲粉，放涼了入口也不亁不硬，抵讚！
4. 咖喱羊肉$86
配薯茸及迷你沙律的尼泊爾咖喱菜，大廚用香草辟走急凍羊肉的羶味，先烤後燜，入口老實未算嫩滑，但全無羶味，不說還以為自己在吃牛肉。
5. 雞肉沙律$65
平凡的烤雞扒、烚蛋、生菜、車厘茄、芹菜等食材，配不平凡的法國油醋汁，沒有一般沙律醬那種味濃感覺，微酸味道反而突出食材的新鮮。
6. 法式田螺$50
小食亭居然提供焗田螺，絕對是驚喜。田螺焗得香口，入口爽甜有陣陣牛油及香草味，配兩片蒜茸包，是矜貴的沙灘小食。
唔啱食可退錢！係咪真？
餐牌寫到明「唔好食，可退錢！」心忖：「退錢？邊有咁大隻蛤乸隨街跳吖？」再望職員周生的鋼條身形，又想：「同佢講話唔好食，會唔會博打呢？」對唔住都要做一次，一於叫靚太同事伊琳做測試。靚太編了個大話，聲震震地說：「我對蝦敏感，唔想要個蝦蘑菇白Pizza，可唔可以換過個菠蘿火腿Pizza畀我呀？」周生聞言立即到廚房炮製另一個Pizza給她，沙灘原來真有蛤乸跳！周生解釋：「我對自己出品好有信心，客人唔滿意一定有佢嘅原因，換另一款菜式或者退錢都無問題。不過我哋都有底線，話太鹹或者太淡唔換，話太辣或者對某食物敏感，我換！不過開店4年以嚟，無客人要求過換Pizza或者退錢。」
食客有Say
Joyce：「每星期幫襯一兩次，最鍾意食辣肉腸Pizza，好有外國風味！唔滿意會唔會換？食咁多次都未試過唔滿意喎。」
Kathy（左）、Lawrence：「未試過小食亭出品，食落覺得唔滿意都唔會換，唔通同佢講：『你啲嘢好難食咩？』」
搵食攻略
鬼佬小廚（28135005）
地址：赤柱正灘小食亭
營業時間：11:00am至11:00pm
座位：50個
交通：銅鑼灣登龍街乘40號專線小巴，步行5分鐘直達，亭外設咪錶位供泊車
