李嘉誠叫得做超人，當然係魄力驚人，雖然80在望，佢不時都會出外公幹，好似前幾日咁，由小超澤鉅同和黃大班霍建寧傍實，去羅馬見意大利總理普羅迪，打通關節，希望蝕到攤攤腰嘅意大利3G業務，快啲有起色。咁出門傾生意，真係閒過立秋，點知超人今勻唔止為公，仲專登約埋紅顏知己周小姐去歐遊，實行公私兩便。
超人同周小姐嘅友好關係，根本係公開嘅秘密，之不過好似今次咁公開，大街大巷十指緊扣，情況確實好少有。話晒超人身邊有保鑣品字形傍實，都可以俾人影到咁清楚，若非有人保護不力，就有人專登放料，大家覺得開邊瓣呢？
有報道話李嘉誠在意大利與WIND傾合作，和黃集團發言人就話，李主席每年均會到英意兩地公幹數次，今次係見3意大利管理層及總理普羅迪。佢又話集團並無與WIND或其大股東Orascom會面，亦冇傾合作。Orascom去年買入和黃旗下的和電國際約兩成權益。
捐身家 又行多一步
除咗去歐遊，超人剛剛喺長實業績會實牙實齒話會捐三分一身家出來，造福大眾，果然唔係得個講字，馬上將佢名下29.5巴仙長江生命科技嘅股份，轉咗畀李嘉誠基金，照噚日收市價0.85元計，即係捐咗24.1億，離佢捐三分一身家嘅目標，又行近咗一小步。
捐咗近三成股份之後，超人再冇長江生科嘅股份，而喺呢個月14號開始，六度增持嘅小超李澤鉅，就以44.33%，做咗最大股東。
李華華
[email protected]