陳冠希（Edison）早排獲日本名導清水崇點名邀請拍攝西片《不死咒怨》續集（TheGrudge2），雖然話身為第一男主角嘅佢喺電影預告片裏面，只係出得幾秒鐘，但Edison仍然一心諗住想發展荷李活市場，可惜有時好多嘢都講求天時地利人和，急都急唔嚟。
乏奸角氣勢
之前美籍華裔導演林諧彬開拍《狂野極速之飄移東京》（TheFastAndTheFurious：TokyoDrift）嗰陣，曾經搵過Edison試鏡，不過最後合作唔成，林諧彬接受訪問時話：「陳冠希表現不錯，可惜身高較男主角LucasBlack（魯卡斯畢列）矮了一截，展現大反派迫人氣勢上就差了一些，只有忍痛淘汰。」
林諧彬喺荷李活漸漸站穩陣腳，佢部《狂》片下個月七號會喺香港放映，完咗呢部戲，佢就開拍西片版《OldBoy》，部戲係改編韓國電影《原罪犯》，𠵱家佢仲籌拍緊電影《李小龍》，早前喺洛杉磯已經有50人嚟試鏡，想做李小龍個角色，但仲未搵啱人選。