還有兩天便開學，家姐為三條化骨龍的開學用品忙得人仰馬翻，連日操夜操的纖體金腰帶也放埋一邊，轉而忙於挑選有「金腰帶」的護脊書包。家姐話：「書包直接影響孩子脊骨健康，只是護脊書包種類繁多，該如何選擇呢？」我說：「這個簡單，請專家教我們便成。」
記者：林佩婷
攝影：譚盈傑
模特兒：陳子慧、賴昊晉、梁熹文
學生哥親試 激鬥4回合
根據專家意見，家姐嚴選了以上6款合乎基本要求的候選心水書包，但仍未有最後決定。我說：「那就讓小朋友自己選擇啦。」
第1回 鬥舒服
無得傾，護脊書包話明護脊，梗係以舒服為前提。3位小朋友揹勻幾款放入同一數量書本的書包，發覺Sanrio的MyMelody護脊納米書包最舒服。子慧仲話：「揹住嚟跑樓梯都仲幾OK。至於Thomas&Friends背部感覺好似有嘢頂住；SPI嘅書包則感覺較重。」
第2回 鬥輕盈
呢回合點都係多啦A夢同HelloKitty兩款標榜超輕的書包佔優。將它們分別放上磅，都只是重約0.1kg，夠晒輕。但可能3位小評判中的2位是女孩，最後都選了HelloKitty為最輕的書包。
第3回 鬥靚仔
小朋友左揀右試，看似認真，但其實呢回合無嘢講，純粹直覺靠樣上位，女孩子都喜愛粉紅色，子慧跟熹文都搶着Sanrio的MyMelody護脊納米書包。
第4回 鬥上斜
此回針對拉轆書包，否則無論書包幾輕都好，背揹上斜點都索氣㗎。百厭仔昊晉分別於平路及斜路測試兩款拉轆書包。「順滑程度都差不多，但就好似Manis嗰個流暢啲，上斜都好好拉，拖住跑都冇話窒窒吓。」
護脊系列
超輕系列
拉轆系列
要識執生
揀啱心頭好，陳醫生繼續提醒：「書包不單止要識揀，仲要識執。」
重書靠背：
重的書本要向背部，再用背帶固定。
用筆袋：
筆盒配件多較重，用筆袋較輕。
空水樽：
現時很多學校都有飲水機，小朋友可於學校才用水樽裝水，便不會太重。
專家話：不過體重15%
陳允灝醫生：「書包重量不應超過自己體重的15%，否則會阻礙血液運行。輕則肌肉抽筋，重則引致脊骨移位及非結構性脊骨側彎症。另外要留意以下數點。」
點揀
1.肩帶闊有腰帶
肩帶夠大最好有墊。最重要是腰帶令書包更貼近身體，將重量平均分布在腰骨及盆骨上，防書包搖擺。
2.書包設固定帶扣
帶扣令書本貼近背部，防重心下降而令脊骨受傷。另慎選背有軟墊，如尼龍或PVC膠等，避免有太多金屬拉鏈及鐵扣。
點揹
1.兩邊肩帶量度整齊。然後收緊肩帶令書包貼近背脊，並使用腰帶固定書包位置。
2.將書包放高至背部才揹上身，謹記勿用單手揹書包。
產品提供
（a）SPI、Sanrio、Thomas&Friends
銅鑼灣軒尼詩道555號崇光百貨6樓 （28338338）
（b）Manis
全線Manis專門店 （21719732）