碰到鬼佬報紙八卦專家，問佢每日寫稿，有乜嘢考慮，可否講一兩點畀左丁山偷師。專家話：「準則只有一條，就係吸多啲讀者睇。西人讀者其實好想知道本地八卦，但因報格有別，西報唔似《蘋果》，平日少呢方面嘅新聞，故此我哋八卦欄好受歡迎。」左丁山係專家嘅長期讀者，偶有所得，同佢講：「我發覺你寫PrinceRichard最多，你有冇偏見或偏好，特別同李察王子friend呀？」專家話：「梗係冇啦，不過我知道凡係專欄提及李超人．李察，特別受鬼佬讀者歡迎，正是徇眾要求，不得不寫！」
哦，呢個道理同十零年前嘅周刊封面一樣，成日擺李超人上封面，就因為保證有銷路。不過呢幾年，因各報刊寫得李超人太多，內容了無新意，搵佢老人家上封面，已經冇咗銷量保證。近期流行何俊仁，佢大概可以紅多一個禮拜，否則除非事情有新發展，傳媒就會淡忘佢。
𠵱家新聞界競爭激烈，求一長期流行「產品」，好唔容易，因productlifecycle好短，燃燒速度太快之故。譬如一個封面人物賣得紙，眨眼間全城周刊報紙電視台都一窩蜂咁擁埋去，於是唔夠一個月，呢位人物就已經被傳媒玩到殘晒，學李碧華話齋，再無利用價值。
睇外國報紙，派拉蒙斷絕湯告魯斯嘅關係，皆因《職業特工隊Ⅲ》嘅賣座不如理想咁好，湯告魯斯分紅太多，派拉蒙冇錢賺，湯佬再無利用價值，於是派拉蒙大老闆SumnerRedstone呢位八十幾歲老人（可以講得係荷李活邵逸夫）親自干預，要湯佬降低薪酬及分紅比例，湯佬唔肯，派拉蒙就立即以湯佬表現失禮，得罪女性觀眾，破壞形象為理由，不再續約，Redstone老先生擺出成個道德老人咁嘅面孔，笑死成個荷李活。
湯告魯斯正尋求對沖基金投資，但基金經理對湯佬嘅票房吸引力，半信半疑，未肯落叠，無論點樣，湯佬俾派拉蒙趕走，以後冇人肯做大豪客搵水喉射住佢。