長毛梁國雄去咗歐洲開會，順便放假探吓朋友，下個月初先至返香港，所以早前何俊仁受暴徒襲擊同辦事處收到刀片恐嚇信咁大單新聞，佢都冇露面現身說法，只係通過長途電話講咗幾句。
最離奇就係，長毛明明應該身在外地冇搞作㗎，偏偏立法會秘書處個電腦剪報系統，噚日就剪咗十幾篇關於「長毛」嘅報道，分派畀所有議員。有議員𢱑晒頭，以為身在歐洲嘅長毛出咗事，否則點會有咁多新聞呢？咁梗係即時click入去睇睇。點知一睇完大家就笑到碌地，原來此「長毛」不同彼「長毛」！
靠晒電腦隨時出事
立法會個剪報系統所講嘅「長毛」，其實係講緊香港動植物公園猿猴家庭添丁，當中有隻baby馬騮嘅特徵，係條頸度圍住一環長毛！勢估唔到呢隻長毛BB猴，竟然喺電腦誤會之下，搖身一變成為尊貴嘅立法會議員。
呢個誤會，當然唔係成日俾長毛鬧嘅高官有心整蠱，只不過「電腦冇腦」，呢個故事教訓我哋做嘢千祈唔好信晒電腦。咁俾人當咗做馬騮，有啲人會好嬲，但身在歐洲維也納嘅長毛就話冇所謂，事關係佢自己叫秘書處，唔理三七二十一，有「長毛」兩隻字嘅剪報就剪低，因為有太多太多人寫佢嘅新聞時，都只用「長毛」兩字而唔提佢個真名梁國雄，佢惟有寧濫勿缺，費事走咗雞都唔知。咁睇嚟，秘書處都交足功課喎。
憂阿牛電台被冚檔
八方睇番動植物公園猿猴家庭啲相，發覺隻「長毛」仔非常得意，個百厭樣同真長毛真係有幾分似，長毛去完歐洲歸來，好應該買梳蕉去探探佢；而如果動植物公園欠缺園丁，可以諗諗去立法會挖角，搵行將退休嘅范太幫手，一定可以管到啲馬騮仔乖一乖。
不過，長毛噚晚同八方傾長途電話，一啲都唔擔心自己變咗猩猩定狒狒定馬騮，反而擔心隻牛，即係阿牛曾健成檔民間電台俾人冚檔，猛問最新情況點。嗱，咩叫做真正朋友？長毛就係典範啦。