上周五約咗班姊妹去蘭桂坊clubbing，老友Casey神神秘秘咁話帶我哋去附近嘅歌賦街食飯。我心諗都係去Lot10、Gough40咁，點知愈行愈遠到街尾，入咗間叫GingkoHouse嘅玻璃屋。原來係新店，唔怪得我未食過啦。呢間法國餐廳嘅裝修格調唔錯，睇真啲，點解入面嘅侍應全部係老人家？
Casey笑笑口講，間店係樂天關懷行動「溫情軒」搞嘅，專為長者提供就業機會，最大嘅員工成73歲。我見佢哋好健壯喎，拼勁仲好過我哋呢班後生女。Casey話呢度啲鵝肝好好食，只係88蚊咋。我早兩日食過鵝肝，就試吓呢度紅酒香草肉眼扒，嘩，好味到唔停得口（本來諗住減肥食少啲㗎嘛），218蚊食到五星級酒店水準！
食完嘢邊飲cocktail邊同班老人家傾偈，先知道佢哋卧虎藏龍。66歲嘅Patrick後生時喺中電做行政級人員，68歲嘅德叔以前仲係小學校長㖭。
Patrick話以前成日想退休，點知退休後玩咗兩年就悶到頹晒，冇晒人生目標，𠵱家有工開即刻精神晒！不過老闆娘呻話，間店開咗一個月就蝕咗近10萬，好驚做唔住。我話唔會嘅，呢度唔只啲嘢好食，仲有一種家庭溫暖嘅感覺，食過嘅熟客一定會再返嚟，放心啦！
（電話：25451200）
逄周一至周四刊出