又入兩球！簡奴日前聯賽作客米杜士堡再次發威，射入兩球，協助樸茨茅夫大勝4:0，估唔到呢位尼日利亞前鋒弗到爆，暫時排喺聯賽神射手榜首位置。
簡奴第1場聯賽對布力般流浪省入兩粒，今次又加多兩球，而且第2球仲係喺半場搶到個波後，憑速度乘單刀之勢射入，認真少見。
33倍與森莫亞睇齊
簡奴𠵱家同韋斯咸嘅森莫亞同樣以4球領先，但從博彩公司開出英超聯賽神射手賠率，1球都未入過嘅亨利仍然列為大熱門，反而簡奴就同森莫亞一樣列做33倍半冷門，似乎對呢兩位前鋒季初跑出嘅表現，都認為只係曇花一現。
其實，樸茨茅夫季初呢3場聯賽表現的確穩陣，前面識入波之餘，後防可以不失一球；難怪領隊哈利列納賽後又再次大讚佢今季羅致嘅門將占士，同埋中堅蘇甘保，尤其占士比賽中救咗唔少射門，可謂「老樸」不失球功臣。哈利列納賽後亦有讚簡奴，總之佢今季收購番嚟嘅新兵個個讚，又一次買花讚花香。不過，哈利列納今季羅致新球員的確有眼光，只着重球隊需要，而唔係胡亂搵啲二、三線球員，季初3場不敗兼不失球，佢嘅功勞的確不可抹殺，而佢表明仲想簽多3名新球員，睇嚟相當有野心！
「簡奴3場比賽入4球，暫時喺聯賽神射手榜同韋斯咸嘅森莫亞一齊領先，雖然賠率反映唔睇好佢由頭帶到尾，但總算攞咗頭威，等其他球隊對樸茨茅夫時都唔敢輕視佢。」